काठमाडौँ, ३० अक्टोबर (हि.स.)। नेपाल र भारतबीच सीमा सुरक्षा, प्रविधिमा आधारित सीमा व्यवस्थापन तथा द्विपक्षीय सहयोगलाई थप सुदृढ बनाउने सहमति भएको छ।

काठमाडौँमा सशस्त्र पुलिस बल नेपालका महानिरीक्षक नारायणदत्त पौडेल र भारतको सशस्त्र सीमा बल (एसएसबी) का महानिर्देशक सञ्जय सिंघलको नेतृत्वमा २८ र २९ अक्टोबरमा सम्पन्न नेपाल-भारत १०औँ समन्वय बैठकमा उक्त सहमति भएको हो।

बैठकमा नवौँ समन्वय बैठकका निर्णयहरूको कार्यान्वयन प्रगतिको समीक्षा गरिएको थियो। साथै, सीमावर्ती क्षेत्रमा हुने अवैध गतिविधि तथा सीमापार अपराध नियन्त्रणका लागि रणनीतिक, कार्यसञ्चालन र कार्यक्षेत्र तहमा सहकार्य बढाउने निर्णय गरिएको छ। यसका लागि दुवै देशले तत्काल सूचना आदानप्रदान गर्ने प्रतिबद्धता व्यक्त गरेका छन्।

दशगजा क्षेत्रको प्रभावकारी व्यवस्थापनका लागि अनधिकृत खेती, अतिक्रमण तथा अवैध संरचना हटाउन संयुक्त प्रयासलाई निरन्तरता दिने सहमति भएको छ। सीमा स्तम्भहरूको मर्मत, सम्भार तथा पुनर्निर्माणका लागि सम्बन्धित संयन्त्रका निर्णयअनुसार, स्थलगत समन्वय बढाउने विषयमा पनि दुवै पक्ष सहमत भएका छन्।

त्यसैगरी, सीमापार आपराधिक सञ्जाल, अवैध तस्करी, मानव बेचबिखन, नक्कली नोट तथा लागुऔषध नियन्त्रणका लागि नियमित रूपमा सूचना आदानप्रदान गर्ने निर्णय गरिएको छ।

खुल्ला सीमाको दुरुपयोग गरी तेस्रो मुलुकका नागरिकको अनधिकृत प्रवेश रोक्न सीमा नाकाहरूमा जाँच तथा कागजात प्रमाणीकरणलाई कडा बनाउने, दशगजा क्षेत्रमा संयुक्त गस्ती गर्ने र शङ्कास्पद व्यक्तिबारे तत्काल सूचना साझा गर्ने सहमति भएको छ।

सीमा व्यवस्थापनलाई आधुनिक तथा प्रविधिमैत्री बनाउन दशगजा क्षेत्रमा सीसीटीभी क्यामेरा जडान गर्ने, प्रमुख सीमा नाकाहरूमा सामान जाँच गर्ने उपकरण तथा आवागमन जाँचका लागि धातु पहिचान गर्ने यन्त्र राख्ने र दुवै देशले आ-आफ्नो क्षेत्रमा ड्रोनको प्रयोग बढाउने विषयमा छलफल भएको छ।

यसका साथै, सामाजिक सञ्जालको दुरुपयोग तथा भ्रामक सूचनाबाट उत्पन्न सुरक्षा र सामाजिक सद्भावसम्बन्धी चुनौती सामना गर्न संस्थागत सहकार्य सुदृढ बनाउने सहमति भएको छ। सीमा सुरक्षाका चुनौती समाधान गर्न आधुनिक प्रविधि तथा विशेष तालिममा सहयोग बढाउने र दुवै सुरक्षा निकायबीच नियमित अध्ययन भ्रमण सञ्चालन गर्ने निर्णय पनि गरिएको छ।

प्राकृतिक विपद् व्यवस्थापनका लागि चितवनको कुरिनटारस्थित सशस्त्र पुलिस बल नेपालको आपदा प्रबन्धन प्रशिक्षण प्रतिष्ठानमा संयुक्त जल उद्धार अभ्यास आयोजना गर्ने विषयमा समेत छलफल भएको छ।

वैध यात्रुहरूलाई सहज आवागमनको सुविधा प्रदान गर्न सीमा नाकाहरूमा सहायता कक्ष विस्तार गर्ने सहमति भएको छ। खेलकुद, अन्तरराष्ट्रिय दिवस तथा प्रमुख चाडपर्वका अवसरमा संयुक्त सांस्कृतिक कार्यक्रम आयोजना गरी आपसी विश्वास र सद्भाव अभिवृद्धि गर्ने निर्णय पनि गरिएको छ।

बैठकमा नेपालका तर्फबाट सशस्त्र पुलिस बल नेपालका वरिष्ठ अधिकारीहरूका साथै परराष्ट्र मन्त्रालय, गृह मन्त्रालय, नापी विभाग, नेपाल पुलिस तथा राष्ट्रिय अनुसन्धान विभागका प्रतिनिधिहरू सहभागी थिए।

त्यसैगरी, भारतका तर्फबाट सशस्त्र सीमा बलका वरिष्ठ अधिकारीहरू, काठमाडौँस्थित भारतीय दूतावास तथा परराष्ट्र र गृह मन्त्रालयका प्रतिनिधिहरूको सहभागिता रहेको थियो।

२०१२ देखि नेपाल र भारतमा पालैपालो आयोजना हुँदै आएको द्विपक्षीय समन्वय बैठकको ११औँ संस्करण आगामी वर्ष भारतमा आयोजना गरिनेछ।