अलिपुरद्वार, 30 अक्टोबर (हि.स.)। भुटानमा हिमनदीको ताल फुटेको कारणले आएको आकस्मिक बाढ़ीले व्यापक विनाश गरेको छ। गए बिहीवार साँझ पहाड़बाट सोहोरिएर प्रचुर मात्रामा आएको पानी, माटो र ढुङ्गा समतलतिर बगिरहेको छ। यसको प्रभाव उत्तर बङ्गालको अलिपुरद्वार जिल्लाको सङ्कोश नदीमा पनि देखिएको छ। नदीको जलस्तर बढेपछि छेउछाउका केही क्षेत्रहरूमा चेतावनी जारी गरिएको छ। प्रशासनले माइकिङ्ग गरेर मानिसहरूलाई सचेत गराइरहेको छ। सम्भावित बाढ़ीको खतरालाई ध्यानमा राख्दै करिब 12 हजार मानिसहरूलाई सुरक्षित स्थानमा सारिएको छ। तर अलिपुरद्वारको कुमारग्राम क्षेत्रमा अहिलेसम्म कुनै ठूलो क्षति वा ज्यानमालको क्षति भएको खबर प्राप्त भएको छैन।

जानकारी अनुसार भुटानको गासा क्षेत्रमा हिमनदीको पानी जम्मा भएर एउटा बनिएको थियो। गए बिहीवार साँझ झीलको किनार अचानक भत्कियो जसपश्चात पहाड़ी क्षेत्रमा ठूलो मात्रामा पानी तीव्र गतिमा तलतिर बग्न थाल्यो। घटनाबाट भुटानका कतिपय क्षेत्रहरू प्रभावित भएका छन्। त्यसपछि असमसँगसँगै उत्तर बङ्गालको सिलगढ़ी र अलिपुरद्वारका केही क्षेत्रहरूमा पनि सतर्कता जारी गरियो।

अलिपुरद्वार प्रशासन अनुसार शुक्रवार बिहानदेखि सङ्कोश नदीको जलस्तर लगातार बढिरहेको छ। यसले लगभग दुई फुटको वृद्धि दर्ता गरेको छ। स्थिति बिग्रियो भने सङ्कोस बाहेक सिलगढ़ी र डुवर्सका अन्य नदीहरूको जलस्तर पनि बढ्ने अनुमान गरिएको छ। तर, अलिपुरद्वारका पुलिस अधीक्षक अमित कुमार शाहले बताए, आतङ्कित हुने आवश्यकता छैन। सावधानीको रूपमा सङ्कोश नदीको किनारमा बसोबास गर्ने करिब 12 हजार मानिसलाई सुरक्षित स्थान र राहत शिविरहरूमा सारिएको छ। राहत शिविरमा पिउने पानी, सुक्खा खाना र शौचालयको व्यवस्था गरिएको छ। राष्ट्रिय आपदा प्रतिक्रिया बलको टोली घटनास्थलमै छ। यसबाहेक राज्य आपदा प्रतिक्रिया बल, नागरिक सुरक्षा एवं स्थानीय प्रशासनका कर्मचारीहरूलाई पनि संवेदनशील क्षेत्रहरूमा तैनाथ गरिएको छ।

सूत्र अनुसार उत्तर बङ्गाल प्रशासनले सङ्कोश नदीको जलस्तर तथा बहाउलाई निरन्तर निगरानी गरिरहेको छ। भुटानी अधिकारीहरूसँग पनि सम्पर्क कायम राखिएको छ। यता भुटानमा भएको क्षय-क्षतिको पूर्ण मूल्याङ्कन हाल हुन सकेको छैन।

हिन्दुस्थान समाचार / उष्णता छेत्री शर्मा