तेल अवीव, ०४ अक्टोबर (हि.स.)। इजरायलका प्रधानमन्त्री बेन्जामिन नेतन्याहूले भारतीय प्रधानमन्त्री नरेन्द्र मोदी र फ्लाईदुबईका भारतीय पाइलट स्मित मच्छरलाई आगामी वर्ष आयोजना हुने इजरायलको स्वतन्त्रता दिवस समारोहमा मशाल बाल्न निमन्त्रणा दिएका छन्। नेतन्याहूले पाइलटको बहादुरीको प्रशंसा गर्दै उनलाई भारत र इजरायलका साहसी मानिसहरूका साथै सम्पूर्ण विश्वका नायक बताएका छन्।

नेतन्याहूले टेलिफोन वार्ताका क्रममा मच्छरको प्रशंसा गरेका हुन्। उनले पाइलटले साहस र जिम्मेवारीको परिचय दिएको बताए। यसअघि दुबईका युवराज हमदान बिन मोहम्मदले पनि अस्पतालमा भर्ना भएका पाइलटसँग भेट गरी उनको प्रशंसा गरेका थिए।

यद्यपि, नेतन्याहूको यो निमन्त्रणा मशाल बाल्ने व्यक्तिका रूपमा अन्तिम छनोटको आधिकारिक घोषणा भने होइन। इजरायलमा स्वतन्त्रता दिवस समारोहका क्रममा मशाल बाल्ने व्यक्तिहरूको छनोट सार्वजनिक परामर्श समितिले गर्छ। त्यसपछि निर्धारित मन्त्रीस्तरीय प्रक्रियाअनुसार नामहरूलाई स्वीकृति दिइन्छ। यस प्रक्रियामा इजरायलकी यातायातमन्त्री मिरी रेगेवको महत्वपूर्ण भूमिका रहन्छ।

इजरायलमा स्वतन्त्रता दिवसका अवसरमा मशाल बाल्नु विशेष सम्मान मानिन्छ। यस समारोहमा सामान्यतया देश र समाजका लागि उल्लेखनीय योगदान पुर्‍याएका व्यक्तिहरूलाई छनोट गरिन्छ।

हिन्दुस्थान समाचार / बिशाल