दुबई, 0५ अक्टोबर (हि.स.)। इरानका तेलमन्त्री मोहसेन पाकनेजादले आफ्नो पदबाट राजीनामा दिएका छन्। सरकारी सञ्चारमाध्यमले आइतबार यसबारे जानकारी दिएको हो। यद्यपि, उनको राजीनामाको कारण भने सार्वजनिक गरिएको छैन। राष्ट्रपति मसुद पेजेशकियनले उनको राजीनामा स्वीकृत गर्दै सरकारी स्वामित्वको नेसनल इरानियन आयल कम्पनी (एनआईओसी) का प्रमुख हमिद बोवार्डलाई कार्यवाहक तेलमन्त्री नियुक्त गरेका छन्।
पाकनेजाद अगस्त २०२४ देखि इरानको तेलमन्त्रीका रूपमा कार्यरत थिए। उनको राजीनामा यस्तो समयमा आएको छ, जतिबेला अमेरिकासँग सात महिनादेखि जारी युद्ध र त्यससँग सम्बन्धित दबाउका कारण इरानको अर्थतन्त्र प्रभावित भइरहेको छ।
इरानी सरकारी सञ्चारमाध्यमले राष्ट्रपति कार्यालयका एक अधिकारीलाई उद्धृत गर्दै पाकनेजादको राजीनामा राष्ट्रपति पेजेशकियनले स्वीकृत गरेपछि हमिद बोवार्डलाई कार्यवाहक तेलमन्त्रीको जिम्मेवारी दिइएको जनाएको छ।
राजीनामा दिनुअघि पाकनेजादले देशको तेल राजस्वबारे इरानले बिक्री गरेको तेलबाट प्राप्त हुने आम्दानी अझै पनि देशले पाइरहेको र आगामी दिनमा पनि यो क्रम जारी रहने अपेक्षा गरिएको बताएका थिए।
इरान पेट्रोलियम निर्यात गर्ने देशहरूको संगठन (ओपेक) को प्रमुख सदस्य हो र देशको अर्थतन्त्रमा तेल क्षेत्रको महत्वपूर्ण भूमिका रहेको छ। यस्तो अवस्थामा तेल मन्त्रालयमा भएको यो परिवर्तन देशले आर्थिक दबाउ र युद्धबाट उत्पन्न चुनौतीको सामना गरिरहेका बेला भएको हो।
हिन्दुस्थान समाचार / बिशाल
