सना (यमन), 0५ अक्टोबर (हि.स.)। साउदी नेतृत्वको गठबन्धनले यमनमा सरकार पुनर्बहाली गर्दै हुती विद्रोहीलाई पराजित गर्ने संकल्प गरेको छ। यमनमा लडिरहेको साउदी नेतृत्वको गठबन्धनका प्रवक्ता मेजर जनरल तुर्की अल-मलिकीले गठबन्धनले यमनी सरकारी सेनालाई सरकार पुनर्बहाली गर्न तथा सुतीको सत्ता कब्जा अन्त्य गर्न आवश्यक सबै प्रकारको सहयोग जारी राख्ने बताएका छन्।
अल-मलिकीले एक्समा यमन र साउदी अरबले लाल सागर तथा बाब अल-मन्देब जलडमरूमध्यमा साउदी जहाजमाथि भएका हुती आक्रमणको निन्दा गरेको बताएका छन्। उनले साउदी अरबले आफ्नो सुरक्षा र सार्वभौमसत्ताका साथै क्षेत्रीय तथा अन्तरराष्ट्रिय सुरक्षाको रक्षा गर्न निरन्तर काम गर्ने बताए।
उल्लेखनीय छ, २०२२ मा संयुक्त राष्ट्रसंघको मध्यस्थतामा भएको युद्धविरामपछि ठूलो स्तरको लडाइँ रोकिएको थियो। त्यसपछि पुनः शुरु भएको पछिल्लो झडपलाई सबैभन्दा गम्भीर मानिएको छ।
यसैबीच, यमनको राष्ट्रपतीय नेतृत्व परिषद्का प्रमुख रशाद अल-अलीमीले इरान समर्थित हुती विद्रोहीको कब्जामा रहेका क्षेत्र फिर्ता लिन ठूलो सैन्य अभियान शुरु गर्ने घोषणा गरेका छन्। यसबारे यमनका रक्षा विशेषज्ञ इब्राहिम जलालले यमनको अन्तरराष्ट्रिय मान्यता प्राप्त सरकार र उसका सहयोगीहरूसामु हुतीहरू शक्तिशाली प्रतिद्वन्द्वीका रूपमा उभिएको बताएका छन्। उनका अनुसार, हुतीहरूले पछिल्ला वर्षहरूमा निकै शक्तिशाली सैन्य शक्ति निर्माण गरेका छन्।
उनले हुतीहरू बाब अल-मन्देब क्षेत्रमा तीव्र रूपमा अगाडि बढिसकेको बताए। अब उनीहरूले महत्वपूर्ण पहाडी क्षेत्रमा कब्जा जमाएर ताइज सहरलाई अदन-यमनी सरकारको अन्तरिम राजधानी र लाहिज प्रान्तबाट अलग पार्दै आफ्नो स्थिति सुरक्षित गर्न खोजिरहेका छन्। यसबाट अदनमाथि दबाउ बढ्ने र आर्थिक केन्द्र मारिब शहरतर्फ आफ्नो नियन्त्रण विस्तार गर्न सहयोग पुग्ने उनको भनाइ छ। उनले भने, “अहिले त्यस शहरमाथि दबाउ कम छ, तर अन्ततः यो अर्को मुख्य केन्द्र बन्न सक्ने सम्भावना छ।”
जलालका अनुसार, हुतीहरूको शक्ति र उनीहरूको बढ्दो प्रभावले सरकार तथा उसका सहयोगीहरूलाई आफ्नो रणनीति परिवर्तन गर्न बाध्य बनाएको छ। राष्ट्रपति रशाद अल-अलीमीले नयाँ ठूलो सैन्य अभियान शुरु गर्ने घोषणा गर्नुले पनि यही संकेत गरेको उनले बताए।
यसैबीच, यमनको अन्तरराष्ट्रिय मान्यता प्राप्त सरकारकी विदेशमन्त्री अफराह अल-जोबाले हुथीलाई पराजित गर्न अन्तरराष्ट्रिय समुदायसँग थप सहयोग मागेकी छन्।
अफराह अल-जोबाले एक्समा लेखेकी छन्, “हामी हाम्रा दाजुभाई, मित्र तथा अन्तरराष्ट्रिय समुदायसँग यमनका जनता, उनीहरूको सरकार र राष्ट्रिय संस्थाहरूलाई सहयोग गर्न अपील गर्छौं। उनीहरू आतंकवादी हुती मिलिसियाको सामना गरिरहेका छन्। यस मिलिसिया र उसका अपराधको दायरा यमनको सीमाभन्दा बाहिरसम्म फैलिएको छ। यसको आक्रामकता रोक्नु र यसको छलपूर्ण सत्ता कब्जा अन्त्य गर्नु अब साझा राष्ट्रिय, क्षेत्रीय तथा अन्तरराष्ट्रिय जिम्मेवारी र हित बनेको छ, जसका लागि दृढ अडान र प्रभावकारी सहयोग आवश्यक छ।”
हिन्दुस्थान समाचार / बिशाल
