कोलकाता, ०७ अक्टोबर (हि.स.)। पश्चिम बंगालका पुलिस महानिदेशक (डीजीपी) सिद्धनाथ गुप्ताको कार्यकाल फेरि ६ महिनाका लागि विस्तार गरिएको छ। उनको अवकाश ३१ अक्टोबरमा निर्धारित थियो। तर कार्यकाल समाप्त हुनुअघि नै केन्द्र सरकारले नवान्न (राज्य सचिवालय) लाई पत्र पठाएर सेवा विस्तारको आधिकारिक जानकारी दिएको छ।

साल १९९२ ब्याचका भारतीय पुलिस सेवाका (आईपीएस) अधिकारी सिद्धनाथ गुप्तालाई निर्वाचन आयोगले हालैको निर्वाचन घोषणा भएको केही समयपछि पीयूष पाण्डेलाई हटाएर राज्यको नयाँ डीजीपी नियुक्त गरेको थियो। उनको कार्यकाल ३० अप्रेलमा समाप्त हुने थियो। तर निर्वाचन सम्बन्धी व्यस्तताका कारण केन्द्रिय गृह मन्त्रालयले पहिलो पटक उनलाई ६ महिनाको सेवा विस्तार दियो। अब दोस्रो पटक कार्यकाल विस्तार गरिएपछि उनी आगामी वर्ष अप्रेलसम्म राज्य पुलिस प्रमुखको पदमा रहनेछन्।

केन्द्रिय मन्त्रिपरिषद्को नियुक्ति समितिको (एसीसी) अधिसूचना अनुसार, केन्द्रिय गृह मन्त्रालयको प्रस्तावमा यो निर्णय गरिएको हो। समितिले ‘जनहित’ लाई ध्यानमा राख्दै अखिल भारतीय सेवा (मृत्यु-सह-सेवानिवृत्ति लाभ) नियम, १९५८ का प्रावधान अनुसार, सेवा विस्तारलाई स्वीकृति दिइएको स्पष्ट गरेको छ।

गुप्ताको अवकाशको मिति नजिकिँदै गएपछि राज्यको नयाँ डीजीपी नियुक्तिलाई लिएर अड्कलबाजी पनि तीव्र भएको थियो। निर्धारित प्रक्रिया अनुसार केन्द्रले राज्य सरकारसँग सम्भावित नामहरूको सूची मागेको थियो। त्यसका आधारमा नवान्नले केही वरिष्ठ अधिकारीहरूको नाम दिल्ली पठाएको थियो। यद्यपि केन्द्रले हालका लागि शीर्ष पुलिस पदमा सिद्धनाथ गुप्तालाई नै कायम राख्ने अन्तिम निर्णय गरेको छ।

/ बिशाल