गान्तोक, 08 अक्टोबर (हि.स.)। तिमी-नाम्फिङका विधायक तथा आबकारी विभागका सल्लाहकार बीएस पन्तले बिहीवार बिहान मनन केन्द्रस्थित आफ्नो कार्यालयमा ‘ई-अफिस’ कार्यक्रमको शुरुआत गर्नुका साथै सिक्किम आबकारी व्यवस्थापन प्रणाली (एसईएमएस) को कार्यान्वयनको थालनी गरेका छन्।

एक एकीकृत डिजिटल संरचना स्थापना गर्ने उद्देश्यले तयार पारिएका यी नयाँ प्रणालीहरूले अनुमति-पत्र प्रक्रियालाई डिजिटलीकरण गर्ने, आपूर्ति शृङ्खलाको निगरानी गर्ने र राज्यभरि नै विभागको कामकारबाहीको वास्तविक-समय अनुगमन गर्न सक्षम बनाउनेछन्।

विधायक तथा सल्लाहकारलाई आबकारी विभागकी सचिव योगिता राई र विभागका वरिष्ठ अधिकारीहरूले स्वागत गरे। पन्तले ‘ई-अफिस’ कार्यक्रमको शुरुआत गरे। यो राष्ट्रिय सूचना विज्ञान केन्द्र (एनआईसी) द्वारा विकसित एक डिजिटल कार्यस्थल समाधान हो, जसले परम्परागत कागजमा आधारित सरकारी फाइल र कार्यालय प्रक्रियाहरूबाट विद्युतीय कार्यप्रणालीतर्फको सङ्क्रमणलाई सहज बनाउँछ।

यसका साथै, उनले सिक्किममा आबकारी प्रशासनलाई आधुनिकीकरण गर्ने उद्देश्यले तयार पारिएको विस्तृत र भविष्यउन्मुख प्लेटफर्म सिक्किम आबकारी व्यवस्थापन प्रणालीको कार्यान्वयनको पनि शुरुआत गरे। एनआईसी सिक्किमको प्राविधिक सहयोगमा विकसित एसईएमएस पूर्ववत् ई-आबकारी प्रणालीको परिष्कृत र अद्यावधिक संस्करण हो।

राज्य आबकारी व्यवस्थापन प्रणालीले परम्परागत दस्तावेज प्रक्रियालाई विस्थापित गर्दै स्वचालित र पारदर्शी कार्यप्रणालीसहितको एकीकृत डिजिटल प्लेटफर्मको रूपमा काम गर्नेछ। यसको लाइसेन्सिङ म्यानेजमेन्ट मोड्युलले केन्द्रिकृत ट्र्याकिङसहित नयाँ आवेदन र नवीकरण प्रक्रियालाई डिजिटलीकरण गर्छ भने आपूर्ति शृङ्खला व्यवस्थापन मोड्युलले कम्पनी पञ्जीकरण, ब्राण्ड लेबलिङ, आयात अनुमति, होलोग्रामको प्रयोगलगायतका विषयहरूको निगरानी गर्छ।

विधायक पन्तले ‘ई-अफिस’ र ‘राज्य आबकारी व्यवस्थापन प्रणाली’ दुवैको सञ्चालन प्रक्रियाबारे विस्तृत रूपमा जानकारी लिए।

उनले आबकारी विभागका अधिकारी तथा कर्मचारीहरूसँग अन्तरक्रियात्मक सत्रमा भाग लिए र प्रणालीको सहज कार्यान्वयन सुनिश्चित गर्न बहुमूल्य सुझाउ तथा रणनीतिक मार्गदर्शन प्रदान गरे साथै उनले प्रशासनिक दक्षताप्रति सरकारको प्रतिबद्धतामा जोड़ दिँदै विभागका मुख्य सरोकारका विषयहरूलाई सम्बोधन गरे।

---------------

हिन्दुस्थान समाचार / बिशाल