नयाँ दिल्ली, १० नोभेम्बर (हि.स.)। राष्ट्रपति द्रौपदी मुर्मुले साइबर अपराधको बढ्दो गम्भीरता र डीपफेक सामग्रीबाट उत्पन्न खतराहरूलाई ध्यानमा राख्दै पुलिस अधिकारीहरूलाई आफ्नो कार्यशैली र दृष्टिकोणमा परिवर्तन ल्याउन सुझाव दिएकी छन्। उनले अत्याधुनिक प्रविधिको प्रयोग गर्ने अपराधीहरूभन्दा पुलिस सधैँ एक कदम अगाड़ी रहनुपर्ने बताइन्।

राष्ट्रपतिले मङ्गलवार राष्ट्रपति भवनमा भारतीय पुलिस सेवा (आईपीएस) को ७८औँ ब्याच (२०२५ ब्याच) का प्रशिक्षार्थी अधिकारीहरूसँग भेटघाटका क्रममा उनीहरूलाई सम्बोधन गर्दै यस्तो बताएकी हुन्। उनले साइबर अपराधको दायरा निरन्तर विस्तार भइरहेको र यस्ता अपराधहरू अझ् गम्भीर बन्दै गएको बताइन्। पुलिसले समाजमा साइबर अपराधको गम्भीरताबारे व्यापक स्तरमा जनचेतना फैलाउनुपर्ने उनले बताइन्।

राष्ट्रपतिले मानिसहरूमा डर पैदा गर्न दुष्प्रचार फैलाउनु गम्भीर समस्याका रूपमा देखा परिरहेको बताइन्। विशेषगरी युवा वर्ग योजनाबद्ध दुष्प्रचारबाट प्रभावित हुनसक्ने उनले बताइन्। यस्ता गतिविधिहरू स्थानीय, क्षेत्रीय र राष्ट्रिय स्तरमा पनि हुन सक्छन्। सतर्क र दक्ष पुलिस व्यवस्थाले यस्ता परिस्थितिलाई गम्भीर रूप लिनबाट रोक्नसक्ने उनले बताइन्।

उनले आम नागरिकका लागि पुलिस अधिकारी र जवानहरू शासन–प्रशासनका प्रतीक हुने बताइन्। पुलिस व्यवस्था राम्रोसँग सञ्चालन हुँदा जनताले शासन व्यवस्था पनि राम्रो भएको महसुस गर्छन्। पुलिस अधिकारीहरूले संवेदनशीलता र ध्यानपूर्वक मानिसहरूका गुनासाहरू सुन्दा उनीहरूमा विश्वास र सुरक्षाको भावना पैदा हुने उनले बताइन्।

राष्ट्रपतिले प्रशिक्षार्थी अधिकारीहरूलाई समाजका कमजोर तथा आर्थिक रूपमा पछाड़ी परेका वर्गका मानिसहरूका समस्यालाई प्राथमिकता दिनुपर्ने बताइन्। यस्ता मानिसहरूको वरिष्ठ अधिकारीहरूसम्म पहुँच प्रायः सीमित हुने गर्छ। त्यसैले उनीहरूका आशङ्का हटाउनु र गुनासोरूको समाधान गर्नु पुलिस अधिकारीहरूको जिम्मेवारी हुनुपर्ने उनले बताइन्।

उनले पुलिस व्यवस्थामा केही कर्मचारीहरू प्रविधिको प्रयोगमा वरिष्ठ अधिकारीहरूभन्दा पनि बढ़ी दक्ष हुनसक्ने बताइन्। यस्तो अवस्थामा वरिष्ठ अधिकारीहरूले आफ्नो टोलीका कनिष्ठ सदस्यहरूबाट पनि सिक्न हिचकिचाउनु हुँदैन। उनले पुलिस अधिकारीहरूलाई कार्यशैलीमा जनसहभागिता र सामूहिक भावनालाई प्रोत्साहन गर्न तथा आफ्ना अधीनस्थ कर्मचारीहरूको कल्याणलाई प्राथमिकता दिन सुझाव दिइन्।

राष्ट्रपतिले पुलिस अधिकारीहरूलाई कानून र नियमहरूले व्यापक अधिकार प्रदान गर्ने भए पनि जनतामाझ वास्तविक सम्मान उनीहरूले आफ्नो कार्यशैली र मूल्यका आधारमा मात्र प्राप्त गर्ने बताइन्। अधिकारीहरूमा नागरिकहरूको सेवा गर्ने प्रतिबद्धता हुनुपर्ने र उनीहरूप्रति श्रेष्ठताको भावना हुनु नहुने उनले बताइन्।

हिन्दुस्थान समाचार / भवानी थामी