दोहा, १० नोभेम्बर (हि.स.)। भारतका ईशा सिंह, मनु भाकर र दिव्या सुबराजूको टोलीले मङ्गलबार आईएसएसएफ विश्व च्याम्पियनसिपअन्तर्गत महिलातर्फको २५ मिटर पिस्तोल टिम स्पर्धामा स्वर्ण पदक जितेको छ। भारतीय निशानेबाजहरूले कुल १ हजार ७६१ अङ्क हासिल गर्दै प्रतियोगितामा शीर्ष स्थान प्राप्त गरेका हुन्।
दक्षिण कोरियाका जिन याङ, येजिन ओह र दाजुङ नाम सम्मिलित टोलीले १ हजार ७४८ अङ्कका साथ रजत पदक जित्यो। यसैगरी, भियतनामको टोलीले १ हजार ७४५ अङ्क हासिल गर्दै कांस्य पदक आफ्नो नाममा गर्यो।
भारतका लागि ईशा सिंहले सर्वाधिक ५९० अङ्क जोडिन्। उनले प्रिसिजन चरणमा २९२ र र्यापिड चरणमा उत्कृष्ट २९८ अङ्क हासिल गरिन्। मनु भाकरले प्रिसिजनमा २८९ र र्यापिडमा २९८ गरी कुल ५८७ अङ्क जोडिन्। त्यसैगरी, दिव्या सुबराजूले प्रिसिजनमा २८९ र र्यापिडमा २९५ गरी कुल ५८४ अङ्कको योगदान दिइन्।
ईशाले प्रिसिजनका तीन चरणमा क्रमशः ९७, ९६ र ९९ अङ्क हासिल गरिन्। त्यसपछि र्यापिड चरणमा उनले १००, ९८ र १०० अङ्क प्राप्त गरिन्। मनुले प्रिसिजनमा ९६, ९६ र ९७ तथा र्यापिडमा ९९, ९९ र १०० अङ्क जोडिन्। दिव्याले प्रिसिजनमा ९७, ९८ र ९४ तथा र्यापिडमा ९८, ९९ र ९८ अङ्क हासिल गरिन्।
व्यक्तिगत स्पर्धाको फाइनलमा ईशा र मनु
भारतीय निशानेबाजहरूले व्यक्तिगत स्पर्धामा पनि उत्कृष्ट प्रदर्शन गरेका छन्। ईशा सिंह तेस्रो र मनु भाकर छैटौँ स्थानमा रहँदै महिलातर्फको २५ मिटर पिस्तोल स्पर्धाको फाइनलमा प्रवेश गरेका छन्।
व्यक्तिगत स्पर्धाको फाइनलले खेलाडीहरूलाई सन् २०२८ मा लस एन्जलसमा आयोजना हुने ओलम्पिक खेलका लागि कोटा स्थान हासिल गर्ने अवसरसमेत प्रदान गर्नेछ।
विश्व च्याम्पियनसिपमा भारतको उत्कृष्ट प्रदर्शन
आईएसएसएफ विश्व च्याम्पियनसिपमा भारतीय निशानेबाजहरूले लगातार पदक जितिरहेका छन्। यसअघि निवेदिता वेलुर नायरले महिलातर्फको २५ मिटर स्ट्यान्डर्ड पेस्तोल स्पर्धामा कांस्य पदक जितेकी थिइन्। जयपाल मालवीयले पुरुषतर्फको १० मिटर एयर पेस्तोल स्पर्धामा रजत पदक हासिल गरेका थिए।
त्यस्तै, रविन्दर सिंह, सौरभ चौधरी र अमनप्रीत सिंहको टोलीले पुरुषतर्फको ५० मिटर पेस्तोल टिम स्पर्धामा स्वर्ण पदक जितेको थियो। उक्त स्पर्धामा रविन्दरले व्यक्तिगततर्फ रजत पदकसमेत आफ्नो नाममा गरेका थिए।
यसैगरी, महिलातर्फको १० मिटर एयर राइफल टिम स्पर्धामा इलाभेनिल वलारिवन, सोनम मस्कर र शाम्भवी क्षीरसागरको टोलीले रजत पदक जितेको थियो।
हिन्दुस्थान समाचार / बिशाल
