- संविधान पखवाड़ा अन्तर्गत जनप्रतिनिधि सम्मेलन आयोजना
चण्डीगढ़, ०२ नोभेम्बर (हि.स.)। लोकसभा अध्यक्ष ओम बिरलाले लोकतन्त्रमा विचार र दृष्टिकोणमा भिन्नतासँगै सहमति र असहमति पनि हुने बताउँदै असहमतिलाई समेत सम्मान गर्नुपर्ने बताएका छन्। असहमतिले दिशा र दर्शन प्रदान गर्नुका साथै काम गर्ने प्रेरणा पनि दिने उनले बताए। सहमति र असहमतिका बाबजुद देश तथा प्रदेशलाई अघि बढ़ाउन सबैले साझा प्रयास गर्नुपर्ने उनले उल्लेख गरे।
ओम बिरला सोमवार पञ्चकुलाको इन्द्रधनुष अडिटोरियममा हरियाणा विधानसभा संविधान पखवाड़ा अन्तर्गत आयोजित जनप्रतिनिधि सम्मेलनको उद्घाटन सत्रलाई सम्बोधन गरिरहेका थिए। बिरलाले हरियाणाको भूमि कर्मभूमिका रूपमा परिचित रहेको बताए। ६० वर्षको यात्रामा अनेकौँ चुनौती र कठिनाइका बाबजुद हरियाणा विकासको अग्रपङ्क्तिमा उभिएको प्रदेश बनेको र यो सबै संविधानका कारण सम्भव भएको उनले बताए। लोकसभा अध्यक्षले भारतको संविधान भारतका लागि मात्र नभई विश्वका सबै लोकतान्त्रिक देशका लागि मार्गदर्शक रहेको बताए।
संविधानले भारतका लोकतान्त्रिक परम्परालाई अघि बढ़ाएको उनले उल्लेख गरे। संविधानले आज पनि जीवन्त रूपमा सबैलाई मार्गदर्शन गरिरहेको उनको भनाइ थियो। संविधान शासन सञ्चालन गर्ने व्यवस्था मात्र नभई भारतको आत्मा पनि भएको उनले बताए।
ओम बिरलाले संविधान निर्माणका क्रममा संविधानसभामा विभिन्न सदस्यहरूले आ-आफ्ना मत र विचार प्रस्तुत गरेको तथा असहमति र लामो छलफलपछि संविधान निर्माण भएको बताए।
उनले संसद्सँगै विधानसभाको व्यवस्था स्थापित भएको र त्यसपछि पञ्चायती राज तथा शहरी क्षेत्रमा लोकतान्त्रिक व्यवस्था विकसित भएको बताए। लोकसभा अध्यक्षले हरियाणा विधानसभाले पनि संविधानको मार्गदर्शनमा विगत ६० वर्षदेखि आफ्ना सदस्यहरूको मत, विचार र दृष्टिकोणका माध्यमबाट प्रदेशको विकासमा योगदान दिँदै आएको बताए।
हरियाणा विधानसभाका सदस्यहरूको विचार र दृष्टिकोणमा भिन्नता हुनसक्ने भए पनि साझा प्रयासबाट प्रदेश र देशलाई अघि बढ़ाउने प्रतिबद्धता सधैँ कायम रहेको उनले बताए। भारतको अर्थतन्त्र तथा सामाजिक-सांस्कृतिक पहिचानमा हरियाणाको ठूलो योगदान रहेको पनि उनले उल्लेख गरे।
लोकसभा अध्यक्षले संविधानका प्रत्येक धारा र अनुच्छेदले दिशा प्रदान गर्ने बताए। संसदीय लोकतन्त्रमा सहमति, असहमति तथा विचारमा भिन्नता हुन सक्ने भए पनि साझा प्रयासबाट देश र प्रदेशलाई अघि बढ़ाउनु विधानसभा सदस्यका रूपमा सबैको जिम्मेवारी भएको उनले बताए।
/ बिशाल
