इन्दौर, ०२ नोभेम्बर (हि.स.)। मध्य प्रदेशको इन्दौरमा आगामी १५ नोभेम्बरमा आयोजना हुने चर्चित पञ्जाबी गायक दिलजीत दोसांझको कन्सर्टलाई बमले उड़ाउने धम्की प्राप्त भएको छ। आतङ्कवादी सङ्गठनको नाममा पठाइएको धम्कीपूर्ण इमेलमा कन्सर्टका क्रममा आईईडी विस्फोट गराउने चेतावनी दिइएको छ।
सोमवार इन्दौरका मेयर पुष्यमित्र भार्गवको कार्यालय र तीन वटा विद्यालयमा उक्त धम्कीपूर्ण इमेल पठाइएको हो। इमेल ‘खालिस्तानी नेशनल आर्मी’को नाममा पठाइएको छ। इमेल पठाउने व्यक्तिहरूले आफूलाई इन्जिनियर गुरानाख सिंह, रुखन शाहवाला, डा. गुरनिरवेर सिंह र बब्बर खालसा (परमार-कनाड) का प्राध्यापक गुरकाल सिंह पीएचडीका रूपमा परिचय दिएका छन्। इमेलमा इन्दौरमा हुने कार्यक्रममा आईईडी विस्फोट गराउने उल्लेख गरिएको छ।
इन्दौर अपराध शाखाका अतिरिक्त पुलिस उपायुक्त (एडीसीपी) राजेश दण्डोतियाले इन्दौरका तीन वटा विद्यालयमा धम्कीपूर्ण इमेल प्राप्त भएको बताएका छन्। ती इमेलमा आगामी १५ नोभेम्बरमा आयोजना हुने दिलजीत दोसांझको कार्यक्रममा आफ्ना बालबालिकालाई नपठाउन चेतावनी दिइएको छ, किनभने त्यहाँ बम विस्फोट गराइने उल्लेख गरिएको छ।
यद्यपि, सावधानीका रूपमा दण्डोतियाले विद्यालयहरूको नाम सार्वजनिक गर्न अस्वीकार गरेका छन्। उनले इमेलको प्राविधिक जाँच भइरहेको जानकारी दिएका छन्।
हिन्दुस्थान समाचार / भवानी थामी
