नयाँ दिल्ली, 0२ नोभेम्बर (हि.स.)। प्रधानमन्त्री नरेन्द्र मोदीले आगामी ५ नोभेम्बरमा नीति आयोगको नयाँ नेतृत्वसँग बैठक गर्ने भएका छन्। विश्वव्यापी अनिश्चितताबीच आयोजना हुन लागेको उक्त बैठकमा आयोगका सदस्यहरूले हाल काम गरिरहेका विभिन्न विषय तथा नीतिगत प्राथमिकताबारे प्रधानमन्त्रीलाई जानकारी गराउनेछन्।
नीति आयोगका एक वरिष्ठ अधिकारीले सोमबार दिएको जानकारीअनुसार, बैठकमा आयोगका सदस्यहरूले आफूहरूले काम गरिरहेका विषय तथा नीतिहरूबारे प्रस्तुति दिने सम्भावना रहेको छ। उक्त प्रस्तुति सन् २०४७ सम्म भारतलाई विकसित राष्ट्र बनाउने सरकारको दृष्टिकोणअनुरूप केन्द्रित हुनेछ।
बैठकमा नीति आयोगका उपाध्यक्ष अशोक लाहिडीसहित सदस्यहरू राजीव गौबा, आर. बालासुब्रमण्यम, जोराम अनिया, केभी राजु, एम. श्रीनिवास, गोबर्धन दास र अभय करंदीकर तथा आयोगका प्रमुख कार्यकारी अधिकृत (सीईओ) अनुराग जैनलगायत वरिष्ठ अधिकारीहरूको सहभागिता रहनेछ।
यसैबीच, केन्द्र सरकारले विश्वव्यापी अनिश्चितताका बीच आर्थिक वृद्धिलाई निरन्तरता दिने, उत्पादनमूलक उद्योग क्षेत्रलाई प्रोत्साहन गर्ने तथा रोजगारीका अवसर सिर्जना गर्ने उद्देश्यसहित आर्थिक वर्ष २०२७-२८ को केन्द्रिय बजेटका प्राथमिकताहरू निर्धारण गर्ने प्रक्रिया पनि शुरु गरेको छ।
प्रधानमन्त्री र नीति आयोगको नयाँ नेतृत्वबीच हुने यस बैठकलाई सरकारको दीर्घकालीन विकास रणनीति तथा आगामी बजेटका प्राथमिकतासँग जोडेर हेरिएको छ।
हिन्दुस्थान समाचार / बिशाल
