बांग्लादेशमा अवामी लिगका नेतामाथि आक्रमण जारी, गोपालगञ्जमा बीजीबीका ५५ प्लाटुन तैनाथ
बांग्लादेश में 19 नवंबर की रात करीब 10 बजे पूर्व सांसद लुत्फुन नेसा के पटुआखाली शहर स्थित घर के मुख्य गेट पर हमला किया गया। फोटो -  सीसीटीवी फुटेज


ढाका, २२ नोभेम्बर (हि.स.)। बंगलादेशमा राजनीतिक अस्थिरता, हिंसात्मक प्रदर्शन र बिग्रँदो शान्ति सुरक्षाको अवस्थाबीच अपदस्थ प्रधानमन्त्री शेख हसिनाको पार्टी अवामी लिगका नेताहरूमाथि आक्रमणका घटना जारी छन्। हसिनाले दिसम्बरमा स्वदेश फर्कने घोषणा गरेपछि तथा सरकारको नकारात्मक रुखविरुद्ध अवामी लिगले विरोध प्रदर्शन गरेपछि विभिन्न जिल्लामा तनाउ बढेको छ। यसैबीच सरकारले शेख हसिनाको गृह जिल्ला गोपालगञ्जमा सुरक्षा व्यवस्था कडा पार्दै सीमा सुरक्षा बल (बीजीबी) का थप २६ प्लाटुन तैनाथ गरेको छ। यससँगै जिल्लामा तैनाथ बीजीबीका कुल प्लाटुनको सङ्ख्या ५५ पुगेको छ।

प्रोथोम अलो, ढाका ट्रिब्युन र द डेली स्टारका अनुसार, शनिबार खुलना जिल्लाको रूपशा उपजिल्लास्थित सेनेर बजारमा दिउँसो तथा खान जहान अली थाना क्षेत्रको फुलबारी गेटनजिक साँझ अवामी लिगका नेताहरूमाथि आक्रमण भएको थियो। आक्रमणमा मोहम्मद मुनिरुज्जमान र मुक्तिजोद्धा प्रोजन्मो लिगका सदस्य ५० वर्षीय लैसुज्जमान घाइते भएका छन्। लैसुज्जमानको अवस्था गम्भीर रहेको बताइएको छ। मुनिरुज्जमान आइचगाटी युनियनअन्तर्गत देओरा क्षेत्रको अवामी लिगको वार्ड नम्बर ५ एकाइका महासचिव हुन्। उनी खुलना जिल्ला कृषक लिगका पूर्वअध्यक्ष प्राध्यापक अशरफुज्जमान बाबुलका भाइ हुन्। पुलिसले लैसुज्जमानमाथि कुटपिट गरेको आरोपमा मिराज नामका एक व्यक्तिलाई पक्राउ गरेको जनाएको छ।

बीजीबी मुख्यालयले शनिबार दिउँसो जारी गरेको विज्ञप्तिअनुसार, गोपालगञ्जमा यसअघि तैनाथ २९ प्लाटुनका अतिरिक्त थप २६ प्लाटुन परिचालन गरिएको हो। जिल्लामा शान्ति सुरक्षा कायम राख्न, सर्वसाधारणको सुरक्षा सुनिश्चित गर्न तथा सम्भावित अप्रिय घटना रोक्न अतिरिक्त सुरक्षा बल परिचालन गरिएको विज्ञप्तिमा उल्लेख छ। तैनाथ जवानहरूले स्थानीय प्रशासन तथा अन्य सुरक्षा निकायसँग समन्वय गरी काम गर्नेछन्।

यसैबीच राजधानी ढाकाको केरानीगञ्ज क्षेत्रअन्तर्गत तेघोरियामा शनिबार बिहान व्यवसायी तथा अवामी लिगका पूर्व नेता नूर आलमको घरमा आक्रमण भएको छ। आक्रमणकारीहरूले घरबाट बहुमूल्य सामान लुट्नुका साथै एउटा गाडीमा आगजनी गरेका थिए। उनीहरूले परिवारका दुई सदस्यलाई गोलीसमेत पुलिस गरेका छन्। गोली लागेर नूर आलमका १७ वर्षीय छोरा रिपाई महमूद लियोन र ७० वर्षीय ससुरा हाजी आलम घाइते भएका छन्। हाजी आलमको उपचार सर सलीमुल्लाह मेडिकल कलेज तथा मिटफोर्ड अस्पतालमा भइरहेको पुलिसले जनाएको छ।

यसअघि पटुआखालीमा अवामी लिगका तीन पूर्व सांसद तथा एक पूर्व नगर प्रमुखका घरमा आक्रमण र तोडफोड गरिएको थियो। कलापारा नगरको कमारपट्टी क्षेत्रमा अवामी लिगका दिवङ्गत पूर्वसांसद अनवर-उल इस्लामको घरमा आक्रमण भएको थियो। त्यस्तै, अनाथालय क्षेत्रमा कलापारा नगरपालिकाका पूर्व नगर प्रमुख तथा अवामी लिगको उपजिल्ला समितिका उपाध्यक्ष एसएम रकीबुल अहसानको घरमा इँटा र ढुङ्गा प्रहार गरिएको थियो। कलापारामै पूर्व राज्यमन्त्री मोहिब्बुर रहमानको आवासमा समेत तोडफोड गरिएको छ। उनी अवामी लिगको जिल्ला समितिका पूर्व उपाध्यक्ष हुन्।

कलापारा पुलिस थानाका प्रभारी मोहम्मद नजरुल इस्लामले यस्ता घटनाबारे आफूहरूकहाँ कुनै उजुरी प्राप्त नभएको बताएका छन्। यसअघि नोभेम्बर १९ को राति करिब १० बजी पटुआखाली शहरको पुरान बजार क्षेत्रमा पूर्व सांसद लुत्फुन नेसाको घरको मुख्य प्रवेशद्वारमा आक्रमण गरी तोडफोड गरिएको थियो। उनी सन् २०१४ देखि २०१८ सम्म दसौँ संसद्मा महिलाका लागि आरक्षित सिटबाट सांसद निर्वाचित भएकी थिइन्। उनी अवामी लिगको पटुआखाली जिल्ला समितिका उपाध्यक्ष सुल्तान अहमदकी पत्नी हुन्। पटुआखाली सदर पुलिस थानाका प्रभारी मोहम्मद मुनिरुज्जमानका अनुसार घटनाको सूचना पाएपछि पुलिस टोली पूर्व सांसदको निवास पुगेको थियो। तर, त्यतिबेला कसैले उजुरी दर्ता नगरेपछि प्रहरी फर्किएको थियो।

यसैगरी, शुक्रबार राति ब्राह्मणबरिया नगरपालिका क्षेत्रको बागानबारीमा प्रतिबन्धित छात्र लिगको जिल्ला इकाइका संयुक्त सचिव मिकाइल हुसेन र नगरपालिका एकाइका अध्यक्ष सामी अहमदको घरमा समेत आक्रमण गरिएको थियो।


 rajesh pande