इस्लामाबाद, 03 नोभेम्बर (हि.स.)। चिनियाँ कम्युनिस्ट पार्टीको केन्द्रिय समितिको अन्तरराष्ट्रिय विभागका मन्त्री लियू हाइक्सिङले सोमबार पाकिस्तानको राजनीतिक तथा सैन्य नेतृत्वसँग विभिन्न उच्चस्तरीय भेटवार्ता गरेका छन्। उनले पाकिस्तानका प्रधानमन्त्री शहबाज शरीफ, चीफ अफ डिफेन्स फोर्सेज फील्ड मार्शल सैयद आसिम मुनीर तथा उपप्रधानमन्त्री इशाक डारसँग भेट गरी द्विपक्षीय सम्बन्ध सुदृढ बनाउने तथा क्षेत्रीय र अन्तरराष्ट्रिय घटनाक्रमबारे छलफल गरेका छन्।
‘द न्युज’ को समाचारअनुसार, पाकिस्तानको विदेश कार्यालयले लियू १ नोभेम्बरमा पाकिस्तान आइपुगेको जनाएको छ। यो उनको पहिलो औपचारिक पाकिस्तान भ्रमण हो।
प्रधानमन्त्री शहबाज शरीफसँगको भेटमा लियूले द्विपक्षीय सहकार्यलाई थप विस्तार र गहिरो बनाउने उपायबारे छलफल गरे। यस अवसरमा शरीफले दुई देशबीचको सम्बन्धलाई अझ मजबुत बनाउन निरन्तर राजनीतिक संवाद र राजनीतिक दलहरूबीच आपसी आदानप्रदान बढाउनुपर्नेमा जोड दिए।
लियू तथा उनको प्रतिनिधिमण्डलको स्वागत गर्दै प्रधानमन्त्री शरीफले पाकिस्तान र चीनबीच अत्यन्त घनिष्ठ, समयको परीक्षामा खरो उत्रिएको तथा हरेक परिस्थितिमा कायम रहने रणनीतिक सहकार्य रहेको दोहोर्याए। उनले दुई देशबीचको मित्रता आपसी विश्वास, सम्मान र जनस्तरको गहिरो सम्बन्धमा आधारित रहेको बताए।
शरीफले व्यापार, लगानी, सम्पर्क सञ्जाल, पूर्वाधार विकास, सूचना प्रविधि तथा कृषि आधुनिकीकरणका क्षेत्रमा सहकार्य विस्तार गर्न दुवै देशको साझा प्राथमिकता रहेको उल्लेख गरे। लियूले चिनियाँ नेतृत्वका तर्फबाट शुभकामना व्यक्त गर्दै पाकिस्तानसँगको पुरानो मित्रतालाई थप प्रगाढ बनाउने चीनको प्रतिबद्धता दोहोर्याए।
दुवै पक्षले क्षेत्रीय तथा अन्तरराष्ट्रिय घटनाक्रमबारे विचार आदानप्रदान गर्दै द्विपक्षीय तथा बहुपक्षीय मञ्चहरूमा निकट समन्वय र सहकार्य कायम राख्ने प्रतिबद्धता व्यक्त गरे। प्रधानमन्त्री शरीफले चिनियाँ नेता तथा उनको प्रतिनिधिमण्डलको सम्मानमा रात्रिभोजसमेत आयोजना गरे।
इन्टर-सर्विसेज पब्लिक रिलेशन्स (आईएसपीआर) का अनुसार, लियू र फिल्ड मार्शल आसिम मुनीरबीचको भेटमा आपसी हितका विषय, क्षेत्रीय तथा अन्तरराष्ट्रिय सुरक्षा परिस्थितिमा भइरहेको परिवर्तन र द्विपक्षीय सम्बन्धबारे छलफल भयो।
मुनीरले पाकिस्तान र चीनबीचको ऐतिहासिक तथा समयको परीक्षामा खरो उत्रिएको सम्बन्धको चर्चा गर्दै निरन्तर उच्चस्तरीय संवाद, सुदृढ संस्थागत सम्बन्ध र आपसी हितका क्षेत्रमा सहकार्य विस्तारको महत्त्व औँल्याए। चिनियाँ प्रतिनिधिले क्षेत्रीय शान्ति तथा स्थायित्वमा पाकिस्तानको योगदानको प्रशंसा गर्दै दुई देशबीचको दीर्घकालीन रणनीतिक साझेदारीलाई थप अगाडि बढाउने विश्वास व्यक्त गरे।
यसैगरी, उपप्रधानमन्त्री एवं विदेशमन्त्री इशाक डारसँगको अर्को भेटमा पाकिस्तानले चीनसँगको रणनीतिक साझेदारीलाई थप सुदृढ बनाउने प्रतिबद्धता दोहोर्यायो। दुवै पक्षले सांस्कृतिक सम्बन्ध तथा जनस्तरको आपसी आदानप्रदान विस्तार गर्ने उपायबारे छलफल गरे। साथै, निकट समन्वय कायम राख्दै द्विपक्षीय सम्बन्धमा कायम सकारात्मक गतिलाई निरन्तरता दिने संकल्प व्यक्त गरे।
पाकिस्तानको राजनीतिक तथा सैन्य नेतृत्वसँग लियूको यी भेटवार्ता दुवै देशले राजनीतिक, आर्थिक, सुरक्षा तथा संस्थागत क्षेत्रमा सहकार्य विस्तार गरिरहेको समयमा भएको हो।
हिन्दुस्थान समाचार / बिशाल
