नयाँ दिल्ली, ०३ नोभेम्बर (हि.स.)। भारतीय शेयर बजारमा आज लगातार चौथो दिन पनि तेजीको क्रम जारी रहेको छ। आज बिहानको कारोबारमा बजारमा उत्साहजनक माहोल देखियो। कच्चा तेलको मूल्य लगातार प्रति ब्यारेल १०० डलरभन्दा माथि रहँदा परेको दबाउका बावजुद घरेलु शेयर बजारमा सकारात्मक मनोभावनाको सहयोगले सेन्सेक्स र निफ्टी दुवै सूचकाङ्कले बलियो शुरुवात गरे। प्रारम्भिक कारोबारकै क्रममा बम्बई स्टक एक्सचेन्ज (बीएसई) को सेन्सेक्स ७०० अङ्कभन्दा बढीले उकालो लाग्यो भने नेसनल स्टक एक्सचेन्ज (एनएसई) को निफ्टी पनि २३,६०० को महत्त्वपूर्ण स्तर पार गर्न सफल भयो।

बजारमा चौतर्फी खरिदारीका कारण आज व्यापक बजारमा पनि दिनको पहिलो सत्रदेखि नै सकारात्मक माहोल कायम रहेको छ। विशेषगरी मध्यम पुँजीकरण भएका कम्पनीका शेयरमा खरिदारीको बढी चाप देखिएको छ। बजारमा आएको तीव्र उछालका कारण बिहान कारोबारको पहिलो एक घण्टामै बीएसईमा सूचीकृत कम्पनीहरूको कुल बजार पुँजीकरणमा करिब दुई लाख करोड रुपियाँको वृद्धि भएको छ। यसबाट लगानीकर्ताको सम्पत्तिमा उल्लेखनीय बढोत्तरी भएको छ।

बजारका विज्ञहरूका अनुसार, आज घरेलु शेयर बजारमा आएको तीव्र तेजीका पछाडि मुख्य रूपमा तीनवटा कारण रहेका छन्। धामी सेक्युरिटिजका उपाध्यक्ष प्रशान्त धामीका अनुसार, बजारलाई सबैभन्दा ठूलो समर्थन दैनिक उपभोग्य वस्तु (एफएमसीजी) क्षेत्रका शेयरबाट प्राप्त भइरहेको छ। मेरिको र गडफ्रे फिलिप्सजस्ता ठूला कम्पनीका शेयरमा आएको तीव्र वृद्धिका कारण यस क्षेत्रको समग्र सूचकाङ्क एक प्रतिशतभन्दा बढीले बलियो भएको छ। यसका अतिरिक्त, विश्व बजारमा चिप निर्माण गर्ने कम्पनीका शेयरमा बिक्रीको दबाउ देखिएपछि घरेलु सूचना प्रविधि (आईटी) कम्पनीप्रति लगानीकर्ताको आकर्षण बढेको छ। यसले भारतीय आईटी कम्पनीका शेयरलाई राम्रो समर्थन प्रदान गरेको छ।

प्रशान्त धामीका अनुसार, बजारमा आएको आजको तेजीको तेस्रो तथा सबैभन्दा महत्त्वपूर्ण कारण विदेशी संस्थागत निवेशकर्ताहरू (एफआईआई) ले भारतीय बजारमा लगातार गरिरहेको ठूलो खरिदारी हो। विदेशी निवेशकर्ताहरूको यस विश्वासलाई बजार नियामक भारतीय प्रतिभूति तथा विनिमय बोर्ड (सेबी) ले सरकारसमक्ष विदेशी निवेशकर्ताहरूलाई दीर्घकालीन पुँजीगत लाभ (एलटीसीजी) करमा छुट दिने प्रस्ताव गरेको समाचारले थप बल पुर्‍याएको छ। यिनै सकारात्मक कारणले गर्दा आज निफ्टीको साप्ताहिक म्याद समाप्त हुने दिन पनि प्रारम्भिक कारोबारका क्रममा शेयर बजार उत्साहजनक देखिएको छ।

हिन्दुस्थान समाचार / बिशाल