पाकिम, ०७ नोभेम्बर (हि.स.)। सिक्किम साहसिक पर्यटन महोत्सव २०२६ अन्तर्गत आयोजित रिले साहसिक गतिविधिको प्याराग्लाइडिङ कार्यक्रम आज सफलतापूर्वक सम्पन्न भएको छ। यसमा १४ जना सहभागीले सिक्किमका मनोरम प्राकृतिक दृश्यबीच साहसिक उडानको अनुभव लिए।
सहभागीहरूले पाकिम जिल्लाको अम्बास्थित निर्धारित उडानस्थलबाट उडान भरी सुरक्षित रूपमा नाम्ची जिल्लाको रोड़ाथाङमा अवतरण गरेका थिए। त्यसपछि उनीहरूलाई नाम्ची जिल्लाको नामथाङस्थित लिङखिमटारमा रहेको महोत्सवको मुख्य स्थलमा पुर्याइएको थियो। त्यहाँ उनीहरूले महोत्सवअन्तर्गत आयोजित विभिन्न साहसिक गतिविधिमा सहभागी हुने अवसर पाए।
सिक्किम सरकारको पर्यटन तथा नागरिक उड्डयन विभागद्वारा आयोजित महोत्सव आज सम्पन्न भएको छ। महोत्सवमा हवाई, स्थल तथा जलमा आधारित विभिन्न साहसिक गतिविधि प्रस्तुत गर्दै सिक्किमलाई प्रमुख साहसिक पर्यटन गन्तव्यका रूपमा प्रवर्द्धन गर्ने लक्ष्य राखिएको थियो।
---------------
हिन्दुस्थान समाचार / बिशाल
