गान्तोक, 07 नोभेम्बर (हि.स.)। महिला, बालबालिका, ज्येष्ठ नागरिक तथा दिव्याङ्गजन कल्याण विभाग, गान्तोक जिल्लाको आयोजनामा अटल वायो अभ्युदय योजना (एभीवाईएवाई) अन्तर्गत ६ नोभेम्बर, २०२६ का दिन सरम्सास्थित बहाई वरिष्ठ माध्यमिक विद्यालयमा जनचेतनामूलक कार्यक्रम सम्पन्न भयो। ‘सशक्त ज्येष्ठ नागरिक, सबल समाज’ नाराका साथ आयोजित कार्यक्रमको उद्देश्य ज्येष्ठ नागरिकहरूमा डिजिटल तथा वित्तीय साक्षरता अभिवृद्धि गर्नु, सक्रिय वृद्धावस्थालाई प्रोत्साहन गर्नु तथा विभिन्न पुस्ताबीचको सम्बन्धलाई थप सुदृढ बनाउनु रहेको थियो।

कार्यक्रममा गान्तोक जिल्लाकी समाज कल्याण अधिकारी मणिकला गुरुङ मुख्य वक्ताका रूपमा उपस्थित थिइन्। आफ्नो सम्बोधनमा उनले वर्तमान डिजिटल युगमा ज्येष्ठ नागरिकहरूका लागि डिजिटल तथा वित्तीय साक्षरताको महत्त्वमाथि प्रकाश पारिन्। उनले डिजिटल सेवाहरूको सुरक्षित प्रयोग, विद्युतीय भुक्तानी तथा अनलाइन ठगी, साइबर अपराध र सामाजिक सञ्जालमा फैलिने भ्रामक सूचनाबाट जोगिने उपायबारे सहभागी ज्येष्ठ नागरिकहरूलाई सचेत गराइन्। वित्तीय शोषणबाट सुरक्षित रहन डिजिटल माध्यमको प्रयोग गर्दा सतर्कता र जिम्मेवारी अपनाउनुपर्नेमा उनले जोड दिइन्।

कार्यक्रमको प्रमुख विशेषताका रूपमा ज्येष्ठ नागरिक र युवा पुस्ताबीचको पुस्तान्तरण सम्बन्धलाई सुदृढ बनाउने विषयमा विशेष जोड दिइयो। यस क्रममा ज्येष्ठ नागरिकहरूको अनुभव, ज्ञान, बुद्धिमत्ता र योगदानको सम्मान गर्नुपर्ने सन्देश प्रवाह गरियो। ज्येष्ठ नागरिकहरूलाई स्थानीय सम्पदा, संस्कृति, परम्परा, सामाजिक मूल्य-मान्यता तथा विगतका पुस्ताले गरेका सङ्घर्ष र परिश्रमबारे आफ्ना जीवनका अनुभव विद्यार्थीहरूसँग साझा गर्न प्रोत्साहित गरियो। साथै, सामाजिक सञ्जालमा प्रसारित अपुष्ट सूचना तथा सामग्रीलाई विश्वास गर्नुभन्दा ज्येष्ठ नागरिकहरूको अनुभवबाट सिक्नुपर्ने विषयमा विद्यार्थीहरूलाई सचेत गराइयो।

कार्यक्रममा ज्येष्ठ नागरिक र विद्यार्थीहरूले संयुक्त रूपमा नृत्य प्रस्तुत गरी पुस्ताबीचको एकता, मित्रता र आपसी सद्भावको सन्देश दिएका थिए। त्यसैगरी, कथा तथा अनुभव आदानप्रदान सत्रमार्फत ज्येष्ठ नागरिकहरूले युवा पुस्तासँग आफ्ना जीवनका अनुभव र परम्परागत ज्ञान साझा गर्ने अवसर पाए।ज्येष्ठ नागरिक, शिक्षक, प्रधानाध्यापक तथा विद्यार्थीहरूको सहभागितामा पदयात्रासमेत आयोजना गरियो। यसले सक्रिय वृद्धावस्था, शारीरिक स्वास्थ्य, सामाजिक एकता तथा सामुदायिक सहभागिताको महत्त्वलाई उजागर गरेको थियो।विद्यालयका प्रधानाध्यापकले ज्येष्ठ नागरिक र युवा पुस्ताबीचको सम्बन्ध सुदृढ बनाउन शैक्षिक संस्थाहरूमा यस्ता अन्तरक्रियात्मक तथा जनचेतनामूलक कार्यक्रम नियमित रूपमा आयोजना गर्नुपर्ने आवश्यकता औँल्याए।

हिन्दुस्थान समाचार / बिशाल