नाम्ची, 07 नोभेम्बर (हि.स.)। महिला, बालबालिका, ज्येष्ठ नागरिक तथा दिव्याङ्गजन कल्याण विभागद्वारा नाम्ची जिल्लाको राजग्रामस्थित आँगनबाडी केन्द्रमा ‘बेटी बचाओ, बेटी पढाओ’ अभियानअन्तर्गत सचेतना कार्यक्रम आयोजना गरियो। बालिकाको शिक्षा, संरक्षण तथा सशक्तीकरणको महत्त्वबारे जनचेतना फैलाउने उद्देश्यले कार्यक्रम आयोजना गरिएको हो।
कार्यक्रमलाई सम्बोधन गर्दै विभागकी कार्यकारी पार्षद् लक्की तामाङले प्रत्येक बालिकालाई गुणस्तरीय शिक्षा उपलब्ध गराउनुपर्ने आवश्यकतामाथि जोड दिइन्। शिक्षाबाट वञ्चित बालिकाहरूलाई रोजगारीको झुटो प्रलोभन देखाएर दलालहरूले शोषण गर्न सक्ने जोखिमप्रति चिन्ता व्यक्त गर्दै उनले अभिभावक तथा समुदायलाई बालिकाको शिक्षा, सुरक्षा र संरक्षणलाई प्राथमिकता दिन आग्रह गरिन्। उनले राजग्राम आँगनबाडी केन्द्रमा पर्याप्त स्थानको उपलब्धतासम्बन्धी विषयमा पनि पहल गर्ने आश्वासन दिइन्।
सहायक निर्देशक तथा जिल्ला पोषण अधिकारी सोफिया लेप्चाले २२ जनवरी, २०१५ मा देशमा घट्दो बाल लिङ्गानुपातलाई सम्बोधन गर्ने उद्देश्यले शुरु गरिएको ‘बेटी बचाओ, बेटी पढाओ’ अभियानको महत्त्वबारे प्रकाश पारिन्। उनले कन्या भ्रूणहत्या जस्ता सामाजिक कुरीतिविरुद्ध जनचेतना फैलाउन, बालिकाको संरक्षण गर्न तथा लैङ्गिक समानता कायम राख्नुपर्ने आवश्यकतामाथि जोड दिइन्। साथै, बालिकाको आर्थिक भविष्य सुरक्षित गर्ने उद्देश्यले सञ्चालन गरिएको सुकन्या समृद्धि खाताका फाइदाबारे पनि जानकारी गराइन्।
कार्यक्रमअन्तर्गत तीन जना नवजात बालिकालाई स्वागत तथा सम्मान गर्दै ‘बेटी जन्मोत्सव’ मनाइयो। यसैगरी, छ महिनासम्म आमाको दूध मात्र खुवाउने अवधि पूरा गरेका एक बालकलाई थप पूरक आहार खुवाउन शुरु गरिएको अवसरमा अन्नप्राशन कार्यक्रम पनि सम्पन्न गरियो। सीडीपीओ लक्ष्मण तामाङले २००६ मा नाम्ची जिल्लामा ८० वटा एकीकृत बाल विकास सेवा (आईसीडीएस) केन्द्र स्वीकृत भएको जानकारी दिए। उनले गर्भवती महिला, स्तनपान गराउने आमा तथा साना बालबालिकालाई आईसीडीएस केन्द्रमार्फत उपलब्ध गराइने पूरक पोषण, खोप, स्वास्थ्य परीक्षण, प्रेषण सेवा तथा खिचडीसहितका पोषण सुविधाबारे जानकारी गराए। साथै, योग्य लाभग्राहीलाई मातृत्वसम्बन्धी सहायता उपलब्ध गराउने प्रधानमन्त्री मातृ वन्दना योजनाबारे पनि प्रकाश पारे।
---------------
हिन्दुस्थान समाचार / बिशाल
