गान्तोक, 07 नोभेम्बर (हि.स.)। सिक्किम सरकारको शिक्षा विभागअन्तर्गत समग्र शिक्षा राज्य परियोजना कार्यालयले भाषा निर्देशनालयसँगको सहकार्यमा सातवटा भाषाका शिक्षकहरूका लागि आयोजना गरेको तीनदिने क्षमता अभिवृद्धि तालिम सम्पन्न भएको छ। ४ देखि ६ नोभेम्बरसम्म बर्तुकस्थित राज्य शैक्षिक अनुसन्धान तथा प्रशिक्षण परिषद् (एससीईआरटी) को सभागारमा आयोजित तालिममा सातवटा भाषा समूहका कुल २६९ जना शिक्षकहरूको सहभागिता रहेको थियो।
राष्ट्रिय शिक्षा नीति (एनईपी) २०२० को उद्देश्यअनुरूप भाषा शिक्षकहरूको व्यावसायिक दक्षता अभिवृद्धि गर्नु, शिक्षण सीपलाई थप प्रभावकारी बनाउनु तथा विद्यालयहरूमा भाषा शिक्षण र सिकाइको गुणस्तर सुधार गर्नु तालिमको मुख्य उद्देश्य रहेको थियो।
कार्यक्रमको उद्घाटन सत्रमा एससीईआरटीका निर्देशक प्रमुख अतिथिका रूपमा उपस्थित थिए। समापन सत्रमा विद्यार्थी कल्याण बोर्डका अध्यक्ष सोनाम छोपेल शेर्पा प्रमुख अतिथि तथा भाषा, पाठ्यपुस्तक र समग्र शिक्षा निर्देशनालयका निर्देशक एडी छेत्री विशेष अतिथिका रूपमा उपस्थित थिए।
कार्यक्रमलाई सम्बोधन गर्दै मुख्य अतिथि शेर्पाले यस पहलको प्रशंसा गर्दै राज्यको भाषिक सम्पदाको संरक्षण तथा प्रवर्द्धनको महत्त्वमाथि जोड दिए। उनले भाषा विकासका लागि क्षमता अभिवृद्धि तालिमलगायत यस्ता कार्यक्रमहरूलाई प्रोत्साहन तथा सहयोग गर्न सरकार सकारात्मक रहेको बताए।
हालै रिज पार्कमा सम्पन्न कला तथा संस्कृति महोत्सवको सन्दर्भ उल्लेख गर्दै उनले भाषा, कला र सांस्कृतिक सम्पदाको प्रवर्द्धनका लागि यस्तै कार्यक्रमहरू आयोजना गर्नुपर्ने आवश्यकता औँल्याए। भाषा व्यक्तिको पहिचानको अभिन्न अङ्ग रहेको उल्लेख गर्दै उनले आफ्नो भाषा गुमाउनु भनेको पहिचान र सांस्कृतिक जरा गुमाउनु पनि हुनसक्ने बताए।
उनले विद्यार्थी कल्याण बोर्डको अध्यक्षका रूपमा आफ्नो क्षमताभित्र रहेर विद्यार्थी कल्याणसँग सम्बन्धित समस्या तथा गुनासाहरू सम्बोधन गर्न हरसम्भव प्रयास गर्ने प्रतिबद्धता व्यक्त गरे। साथै, भविष्यमा विद्यार्थीहरूको हित तथा समग्र विकासका लागि थप यस्ता कार्यक्रम र पहलहरू आयोजना गर्ने आश्वासन दिए।
यस पहललाई निरन्तरता दिँदै राज्यका थप भाषा शिक्षकहरूलाई व्यावसायिक विकासको अवसर प्रदान गर्ने उद्देश्यले बाँकी पाँचवटा भाषालाई समेटेर २०२७ को फरवरी महिनाको पहिलो सातामा अर्को चरणको क्षमता अभिवृद्धि तालिम आयोजना गर्ने प्रस्ताव गरिएको छ।
हिन्दुस्थान समाचार / बिशाल
