कोलकाता, 14 फरवरी (हि.स.)। कोलकातास्थित नेताजी सुभाष चंद्र बोस अन्तरराष्ट्रिय हवाई अड्डामा त्यसबेला होहल्ला मच्चियो, जब कोलकाताबाट शिलाङतर्फ जाने इन्डिगोको निर्धारित उडानमा बम रहेको आशंका व्यक्त गरियो।

विमानस्थल व्यवस्थापनद्वारा शनिबार बिहान जारी आधिकारिक वक्तव्यअनुसार, विमानको शौचालयभित्र हस्तलिखित पर्चा भेटिएको थियो, जसमा बम भएको संकेत गरिएको थियो। उक्त पर्चा विमानका एक चालकदलका सदस्यले देखेको थियो।

सन्दिग्ध सन्देश भेटिएलगत्तै चालकदलले सम्बन्धित सुरक्षा निकाय र विमानस्थल अधिकारीहरूलाई तुरुन्त जानकारी गराएका थिए। सूचना प्राप्त हुनासाथ विमानस्थलमा आपतकालीन सुरक्षा प्रोटोकल सक्रिय गरियो।

सावधानीस्वरूप विमानलाई मुख्य टर्मिनल क्षेत्रबाट हटाई पृथक रूपमा राख्ने सुरक्षित स्थानमा सारियो। त्यसपछि मानक कार्यविधिअनुसार विमान र यात्रुहरूको सुरक्षा सुनिश्चित गर्न सबै आवश्यक सावधानी कदम चालिएका थिए। बम निष्क्रिय पार्ने टोली र सुरक्षा निकायहरूले विमानको विस्तृत जाँच शुरु गरेका छन्।

विमानस्थल प्रशासनले यात्रु र उडान सञ्चालनको सुरक्षा नै सर्वोच्च प्राथमिकता भएको स्पष्ट पारेको छ। सम्पूर्ण घटनाक्रमका क्रममा अवस्थामाथि निरन्तर निगरानी राखिएको र सम्भावित जोखिम सामना गर्न सम्बन्धित सबै निकाय सतर्क रहेको जनाइएको छ।

हाल घटनाको जांच जारी छ। सन्दिग्ध पर्चाको सत्यता तथा स्रोत पत्ता लगाउने प्रयास भइरहेको छ। यात्रुहरूलाई आवश्यक सहयोग उपलब्ध गराइएको छ र सुरक्षा व्यवस्था अझ कडा बनाइएको छ।

---------------

हिन्दुस्थान समाचार / भवानी थामी