खड्गपुर, 14 फरवरी (हि.स.)। पहलगाम घटनाको वार्षिकोत्सवअघि भ्यालेन्टाइन वीकका अवसरमा सेनाले विशेष रातो गुलाबको नयाँ प्रजातिलाई ‘अपरेशन सिन्दूर’ नाम दिएको छ। यो नाम वीरता र अदम्य साहसको प्रतीकका रूपमा राखिएको हो।

यो हाइब्रिड प्रजाति खड्गपुरको जकपुरस्थित पुष्पाञ्जलि रोज गार्डेनमा विकास गरिएको हो। यसका सर्जक प्रनबीर माइतीले यसअघि पनि गुलाबका धेरै विशेष प्रजाति विकास गरिसकेका छन्, जसलाई देशका महत्वपूर्ण स्थानहरूको नाममा नामकरण गरिएको छ, जसमा राष्ट्रपति भवन पनि समावेश छ।

रातो र सुगन्धित यस गुलाबमा ३० देखि ३५ वटा पत्र हुन्छन्। यसको उचाइ १२० देखि १५० सेन्टिमिटरसम्म हुन्छ र यो वर्षभरि फुल्ने गर्दछ। यो प्रजाति रोग प्रतिरोधात्मक क्षमताले भरिपूर्ण छ र यसलाई गमलामा वा सिधै माटोमा रोप्न सकिन्छ।

शुक्रबार पूर्वी कमानका ब्रिगेडियर सुधीर सोढ़ी लगायत सेनाका अधिकारीहरूले गृह मन्त्रालयको अनुमति पश्चात् फूल बजारमा यस नयाँ प्रजातिको अनावरण गरेका थिए। त्यसपछि शनिबारदेखि यो गुलाब बजारमा बिक्रीका लागि उपलब्ध भएको छ।

जानकारी अनुसार, प्रनबीर माइतीले गत वर्ष जम्मु-कश्मीरमा ट्युलिप गार्डेन नजिकै रोज गार्डेन परियोजनाको पहल गरेका थिए र त्यहाँको मुख्यमन्त्री कार्यालयसँग धेरै चरणमा छलफल पनि गरेका थिए। तर ‘अपरेशन सिन्दूर’ का कारण उक्त परियोजना ढिलाई भएको थियो।

पछि माइतीले सेनासँग सम्पर्क गरेपछि विशेष गुलाब विकास गरी मिशनको नाममा समर्पित गर्ने प्रस्ताव आएको थियो। माइती, उनका परिवार तथा स्थानीय समुदाय यस पहलसँग जोडिन पाउँदा गर्व महसुस गरिरहेका छन्।

माइतीले भने, “हामीले नयाँ प्रजातिको गुलाब तयार गरी सामाजिक सञ्जालमा साझा गरेका थियौँ। त्यसपछि यसलाई मिशनको नामसँग जोड्ने प्रस्ताव आयो। सेनाको उपस्थितिमा यसको अनावरण हुनु हाम्रो लागि गर्वको विषय हो। देशहितमा एउटा फूल समर्पित गर्नु मेरो लागि सम्मानको कुरा हो।”

---------------

हिन्दुस्थान समाचार / भवानी थामी