थेङ, 14 फरवरी (हि.स.)। उत्तर सिक्किमको थेङमा सीमा क्षेत्र विकास कार्यक्रम (बीएडीपी) अन्तर्गत निर्माण गरिएको क्याफेटेरिया र शौचालय आज औपचारिक रूपमा उद्घाटन गरिएको छ। उक्त संरचनाको उद्घाटन सामाजिक कल्याण विभागका मन्त्री तथा लाचेन मङ्गन निर्वाचन क्षेत्रका विधायक साम्डुप लेप्चाले गरे।

उद्घाटन कार्यक्रममा चुङथाङ ग्राम पञ्चायत एकाइका पञ्चायत अध्यक्ष, पञ्चायत सदस्यहरू, विभिन्न विभागका अधिकारीहरू तथा सर्वसाधारणको उपस्थिति रहेको थियो।

समारोहलाई सम्बोधन गर्दै मन्त्रीले दुर्गम तथा सीमावर्ती क्षेत्रमा आधारभूत पूर्वाधार सुदृढ़ गर्नुको महत्त्वबारे प्रकाश पारे। उनले सिक्किम पर्यटनमुखी राज्य भएकाले यहाँ आउने आगन्तुकहरूको सुरक्षा, सहजता र सुविधामा राज्य धेरै निर्भर रहेको उल्लेख गरे। सफा र पहुँचयोग्य सार्वजनिक सुविधा, जस्तै क्याफेटेरिया र शौचालयको निर्माण स्थानीय बासिन्दाको हितका साथै सुरक्षित, दिगो र जिम्मेवार पर्यटन प्रवर्द्धनका लागि आवश्यक रहेको उनले बताए।

मन्त्रीले परियोजना सफलतापूर्वक सम्पन्न गर्न योगदान पुर्‍याउने सबै विभाग, अधिकारी तथा सरोकारवालाहरूको प्रयासको प्रशंसा गरे। उक्त संरचनाले स्थानीय समुदाय र क्षेत्र भ्रमण गर्ने पर्यटकहरूलाई ठूलो लाभ पुग्ने विश्वास व्यक्त गर्दै यसले सरसफाई, स्वच्छता र सार्वजनिक सुविधामा सुधार ल्याउने उल्लेख गरे।

उनले निर्वाचन क्षेत्रमा सन्तुलित विकास, पूर्वाधार सुदृढीकरण तथा सार्वजनिक सुविधाहरू विस्तार गर्ने प्रतिबद्धता पुनः व्यक्त गरे।

---------------

हिन्दुस्थान समाचार / बिशाल