रियाद, फरवरी १९ (हि.स.)। पर्तुगलका फुटबल लिजेन्ड क्रिस्टियानो रोनाल्डोको अनुपस्थितिमा साउदी अरबकाे क्लब अल नासर एएफसी च्याम्पियन्स लिग २ फुटबल प्रतियोगिताको क्वार्टरफाइनलमा प्रवेश गरेको छ। अल नासरले तुर्कमेनिस्तानको अर्कादागलाई १-० ले पराजित गर्दै समग्रमा २-० को जित हासिल गरेको छ।४१ वर्षीय रोनाल्डो खेलमा टोलीको हिस्सा थिएनन् र स्ट्यान्डबाट हेरिरहेका थिए। मिडिया रिपोर्टका अनुसार, उनलाई साउदी प्रो लिग र एएफसी च्याम्पियन्स लिग २ मा आगामी महत्वपूर्ण खेलहरूको लागि आराम दिइएको हाे। दिसम्बर २०२२ मा रियादस्थित अल नासरमा सामेल भएदेखि उनले अहिलेसम्म कुनै प्रमुख उपाधि जितेका छैनन्।अल नासरले क्वार्टरफाइनलमा युएई क्लब अल वस्लको सामना गर्नेछ। दुई टोलीबीचको पहिलो खेल 3 मार्चमा खेलिनेछ।यसैबीच, शीर्ष-स्तरीय एएफसी च्याम्पियन्स लिग एलिट प्रतियोगितामा पूर्वी क्षेत्रका जापानका तीन र दक्षिण कोरियाका दुई क्लबहरू अन्तिम-१६ चरणमा पुगेका छन्। मलेसियाको जोहोर दारुल ताजिम र थाइल्याण्डको बुरिराम युनाइटेड पनि अर्को चरणमा पुगेका छन्, जबकि अष्ट्रेलियाको मेलबर्न सिटी २०१६ पछि अन्तिम-१६ मा पुग्ने दोस्रो अष्ट्रेलियाली टोली बनेको छ।पश्चिमी क्षेत्रमा साउदी अरबका क्लबहरूले प्रभुत्व जमाएका छन्। अल हिलाल, अल अहली र अल इत्तिहाद शीर्ष चारमा परेका छन्। इरानको ट्रयाक्टर क्लब तेस्रो स्थानमा छ भने कतारको अल दुहैल र अल सादले अल वहदासँगै अन्तिम-१६ मा पनि स्थान बनाएका छन्। अन्तिम-१६ खेलहरूको पहिलो चरण २ र ३ मार्चमा खेलिनेछ।

हिन्दुस्थान समाचार / भवानी थामी