गेजिङ, 26 फरवरी (हि.स.)। गेजिङ जिल्लाका जिल्लापाल तेन्जिङ डी. डेन्जोङ्पाको अगुवाईमा आज टाशीडिङ गुम्बामा आगामी पवित्र बुम चु कार्यक्रमको अन्तिम तयारी बैठक एवं स्थल भ्रमण सम्पन्न गरियो। बैठकमा गेजिङका पुलिस अधीक्षक छिरिङ शेर्पा, एसएसबी 72औं बटालियनका उप कमान्डेन्ट मेगनाथ राउथ, गेजिङ जिल्ला अस्पतालका सीएमओ डा. नामगे भोटिया, एसडीएम सीएस लिम्बू, टाशीडिङ गुम्पाका सदस्यहरू तथा अन्य सरोकारवालाहरू उपस्थित थिए।
बैठक र स्थल भ्रमणको मुख्य उद्देश्य आगामी २-३ मार्चमा आयोजना हुने बुम चु महोत्सव तयारीको आकलन गर्नु थियो। जिल्लापाल डेन्जोङ्पाले आफ्नो सम्बोधनमा सबै अधिकारीहरू र आयोजकहरूबाट पूर्ण सहयोगको लागि आह्वान गरे। उनले बिजुली, पानी आपूर्ति, चिकित्सा र अग्नि प्रतिक्रिया टोली, ट्राफिक नियन्त्रण, भीड व्यवस्थापन, भक्तहरूको लागि कुपन , आगन्तुकहरूको लागि मानकीकृत सेवा दर, फोहोर व्यवस्थापन र सरसफाई लगायतका आवश्यक व्यवस्थाहरूको विस्तृत समीक्षा गरे।
यसअघि, सम्बन्धित वार्डका पञ्चायत ग्याछो भोटियाले जिल्लापाल र पुलिस अधीक्षकलाई प्रारम्भिक तयारी बैठकको निर्देशनपछि भएको प्रगतिको बारेमा जानकारी गराए। उनले ट्राफिक र पार्किङ व्यवस्थापन, पानी र बिजुली आपूर्ति, अस्थायी पालहरूको उपलब्धता र भक्तहरूको लागि अन्य आवश्यक सुविधाहरूको सम्बन्धमा गरिएका उपायहरूको बारेमा जानकारी गराए। उनले गुम्पाको तर्फबाट कृतज्ञता व्यक्त गर्दै महोत्सवलाई सहज र व्यवस्थित बनाउन जिल्ला अधिकारीहरूको सहयोगको लागि धन्यवाद दिए।
बैठकपछि, टोलीले महोत्सव स्थलको गहन निरीक्षण गर्यो। सबै व्यवस्थाहरूको समीक्षा गरियो भने अन्तिम तयारीलाई तीव्र बनाउन स्पष्ट निर्देशनहरू जारी गरियो।
यस अतिरिक्त, जिल्लापाल र टोलीले आज आएको भूकम्पको झट्काले टाशीडिङ सरकारी उच्चतर विद्यालय र केटाहरूको छात्रावासलाई पुऱ्याएको सामान्य क्षतिको अवलोकन गऱ्यो। जिल्लापालले भूकम्पका कारण कुनै गम्भीर क्षति भएमा जिल्ला प्रशासनबाट आवश्यक सहयोग प्रदान गरिने आश्वासन दिए।
हिन्दुस्थान समाचार / बिशाल
