- मुख्यमन्त्रीले यस खोपको महत्त्वको बारेमा जागरूकता फैलाउन गर्न आग्रह गरे

गान्तोक, 28 फरवरी (हि.स.)। प्रधानमन्त्री नरेन्द्र मादीले शुक्रवार राजस्थानको अजमेरबाट नेशनल ह्युमन प्यापिलोमाभाइरस (एचपीवी) खोप अभियानको शुभारम्भ गरे। मुख्यमन्त्री प्रेमसिंह तामाङ राजधानीको सम्मान भवनबाट राष्ट्रिय एचपीवी खोप अभियानको शुभारम्भ कार्यक्रममा भर्चुअल रूपमा सहभागी भए।

समयमै खोप लगाएर किशोरीहरूमा सर्वाइकल क्यान्सर रोक्ने उद्देश्यले भारत सरकारको स्वास्थ्य तथा परिवार कल्याण मन्त्रालयको राष्ट्रिय स्वास्थ्य मिसन अन्तर्गत यो अभियान शुरु गरिएको हो। प्रधानमन्त्रीले आफ्नो सम्बोधनमा एचपीवी खोप अभियानलाई निवारक स्वास्थ्य सेवालाई सुदृढ पार्ने र किशोरीहरूको कल्याण सुनिश्चित गर्ने दिशामा एक प्रमुख कदमको रूपमा वर्णन गरे। यस अवसरमा प्रधानमन्त्रीले राजस्थानमा लगभग १७ हजार करोड बराबरका विकास परियोजनाहरूको उद्घाटन र शिलान्यास पनि गरे। यसैगरी, उनले २१ हजारभन्दा बढी युवाहरूलाई नियुक्ति पत्र वितरण गरे।

मुख्यमन्त्री तामाङले सम्मान भवनमा आयोजित कार्यक्रमलाई सम्बोधन गर्दै विशेष गरी १४ वर्ष उमेरका केटीहरूको लागि एचपीभी खोपको महत्वमाथि प्रकाश पारे। उनले महिलाहरूमा क्यान्सरसँग सम्बन्धित मृत्युको प्रमुख कारणहरू मध्ये सर्वाइकल क्यान्सर एक रहेको बताउॅंदै प्रभावकारी रोकथामको लागि प्रारम्भिक खोप आवश्यक रहेको बताए। उनले राज्यभर तोकिएका सरकारी स्वास्थ्य सुविधाहरूमा खोप नि:शुल्क दिइने पनि जानकारी दिए।

मुख्यमन्त्रीले भने, सिक्किमले प्राथमिक स्वास्थ्य सेवाहरूलाई सुदृढ पार्न, खोप कभरेज विस्तार गर्न, जिल्ला अस्पतालहरूको स्तरोन्नति गर्न र विशेष उपचारमा पहुँच सुधार गर्न निरन्तर प्रयासहरू गर्दै स्वास्थ्य क्षेत्रलाई निरन्तर प्राथमिकता दिएको छ। उनले सरकार राज्यका दुर्गम क्षेत्रहरूमा पनि स्वास्थ्य सेवाहरूको पहुॅंच सुनिश्चित गर्दै निवारक र प्रवर्द्धनात्मक स्वास्थ्य सेवा पहलहरू बढाउन प्रतिबद्ध रहेको बताए। उनले अभिभावक, शिक्षक र स्वास्थ्यकर्मीहरूलाई यस अभियानलाई सक्रिय रूपमा समर्थन गर्न र समयमै खोपको महत्त्वको बारेमा व्यापक जागरूकता फैलाउन गर्न आग्रह गरे।

सम्मान भवनमा आयोजित उद्घाटन कार्यक्रमको एक भागको रूपमा मोडर्न वरिष्ठ माध्यमिक विद्यालय र पीएम श्री वरिष्ठ माध्यमिक विद्यालय, देवरालीका नौ जना विद्यार्थीहरूलाई चिकित्सकहरूले खोप लगाए। प्रत्येक खुराकमा ०.५ एमएल गार्डासिल ९ हुन्छ, जसले नौ प्रकारका मानव प्यापिलोमाभाइरस विरुद्ध सुरक्षा प्रदान गर्दछ, र यसलाई इंजेक्शन मार्फत दिइन्छ। यस अभियान अन्तर्गत सबै राज्य र केन्द्र शासित प्रदेशहरूमा वार्षिक रूपमा १४ वर्ष उमेरका लगभग १.१५ करोड केटीहरूलाई समेट्ने लक्ष्य राखिएको छ।

कार्यक्रममा स्वास्थ्य तथा परिवार कल्याण मन्त्री जीटी ढुङ्गेल, क्याबिनेट सचिव वीबी पाठक, मुख्य सचिव आर. तेलाङ, शिक्षा विभागका प्रधान सचिव सन्दीप ताम्बे, स्वास्थ्य तथा परिवार कल्याण सचिव छेवाङ ग्याछो, शिक्षा विभागका सचिव टाशी छोपेल लेप्चा, महिला तथा बाल, ज्येष्ठ नागरिक तथा दिव्याङ्गजन कल्याण विभागकी सचिव नोर्मित लेप्चा आदि उपस्थित थिए।

हिन्दुस्थान समाचार / बिशाल