इम्फाल, 11 मार्च (हि.स.)। राज्य सरकारको निर्देशन पालना गर्दै मणिपुरमा पुलिस प्रशासनले लागूऔषध दुरुपयोग विरुद्धको अभियान सक्रियतापूर्वक सञ्चालन गरिरहेको छ भने अफिम खेती नष्ट गर्दै गाँजा, हेरोइन र अन्य लागूऔषध जफत गरिरहेको छ। मणिपुर पुलिस मुख्यालयले आज बिहान जारी गरेको आधिकारिक जानकारी अनुसार, दुई छुट्टाछुट्टै कारबाहीमा ३५ ऐकर अफिम खेती नष्ट गरिएको छ। ठूलो मात्रामा गाँजासहित तीन तस्करलाई पनि पक्राउ गरिएको छ।

प्राप्त जानकारी अनुसार, मंगलबार सुरक्षा बल, एनसीबी र वन विभागले काङपोक्पी जिल्लाको साइकुल पुलिस चौकी अन्तर्गत टिङपिबुङ गाउँ र लेपलेन गाउँ बीचका धेरै स्थानहरूमा लगभग १० ऐकर अफिम खेती नष्ट गरेको छ। यद्यपि, यस घटनामा कसैलाई पनि पक्राउ गरिएको छैन। अर्को कारबाहीमा सुरक्षा बल र वन विभागले उखरूल जिल्लाको लिटान पुलिस चौकी अन्तर्गत सिनाकेइथेई क्षेत्रमा लगभग २५ ऐकर अवैध अफिम खेती नष्ट गरेको छ।

अर्को कारबाहीमा, मणिपुर पुलिसले हिङगाङ पुलिस चौकी अन्तर्गत पर्ने मन्त्रीपुखरी क्षेत्रबाट प्रतिबन्धित गाँजासहित इम्फाल पूर्वी जिल्लाका तीन तस्करहरूलाई पक्राउ गरेको छ। अभियुक्तहरूको पहिचान अरिबम मनीष (२४), शाजाबाम असलम खान (३२) र दिनेश चिङ्गाखम (२४) को रूपमा गरिएको छ।

तस्करहरूबाट एउटा चारचक्के सवारी साधन र लगभग १६.६० किलो गाँजा बरामद गरिएको छ। पुलिसले एनडीपीएस ऐन अन्तर्गत एफआईआर दर्ता गरेको छ र अभियुक्तहरूसँग गहन सोधपुछ गरिरहेको छ।

हिन्दुस्थान समाचार / भवानी थामी