तेहरान, २२ मार्च (हि.स.)। ईरानको सेनाले अमेरिकी राष्ट्रपति डोनाल्ड ट्रम्पलाई ठाडो चुनौती दिएको छ। सेनाले भनेको छ, यदि अमेरिकाले देशका आणविक ऊर्जा संयन्त्रहरू (पावर प्लान्ट) मा आक्रमण गरेमा मध्य-पूर्वका ऊर्जा र जलशोधनका आधारभूत संरचनाहरूलाई निशाना बनाइनेछ। ईरानको सेनाको यो भनाई राष्ट्रपति ट्रम्पको धम्कीको जवाफमा आएको हो। ट्रम्पले धम्की दिएका छन् कि यदि ४८ घण्टाभित्र होर्मुज स्ट्रेट नखोले ईरानका पावर प्लान्टहरूलाई पूर्ण रूपमा ध्वस्त पारिनेछन्।

ईरानको फार्स न्यूज एजेन्सीको रिपोर्टका अनुसार, त्यसपछि ईरानको सेनाले भनेको छ, हाम्रो अघिल्लो चेताउनीपछि यदि शत्रु (अमेरिका) ले ईरानको इन्धन र ऊर्जाका आधारभूत संरचनाहरूमा क्षति पुर्यायो भने मध्य पूर्वमा अमेरिका र यसका समर्थक सरकारहरूसँग सम्बन्धित सबै ऊर्जा, सूचना प्रविधि र जलशोधनका आधारभूत संरचनाहरूलाई निशाना बनाइनेछ।

यसबीच इस्लामिक रिभोल्युसन गार्ड्स कोर्प्स (आईआरजीसी) को एयरोस्पेस फोर्सका कमान्डर ब्रिगेडियर जनरल सैयद माजिद मूसावीले भने, इजरायलको आकाशमा ईरानी मिसाइलहरूको नियन्त्रण छ। उनले भने, ईरानले अन्तरराष्ट्रिय आणविक ऊर्जा एजेन्सीलाई नतान्जस्थित आफ्नो आणविक सुविधामा अमेरिका र इजरायलको आक्रमणबारे सूचित गरिसकेको छ।

आईआरजीसी को नौसेनाका कमान्डर रियर एडमिरल अलीरेजा तंगसिरीले अमेरिकालाई कडा चेताउनी दिँदै भने, यदि आक्रमण भयो भने फारसको खाडीमा रहेका ईरानी टापुहरू अमेरिकी सैनिकहरूका लागि कब्रिस्तान बन्नेछन्। तंगसिरीले भने, संयुक्त अरब अमिरातको अल-मिन्हाद एयर बेस र कुवेतको अली अल-सलेम एयर बेसमा रहेका आधारहरूलाई ध्वस्त गरिसकिएको छ।

---------------

हिन्दुस्थान समाचार / भवानी थामी