तेहरान/तेल अवीव/बेरुत/वाशिङ्टन, २५ मार्च (हि.स.)। अमेरिका-इजरायल र इरानबीच २८ फेरवरीदेखि शुरु भएको युद्ध दिनप्रतिदिन बढ्दै गएको छ। यस युद्धको प्रभावले खाडी क्षेत्रका देशहरू पनि प्रभावित भइरहेका छन्। तेल र ग्यासमा निर्भर विश्वका अन्य देशहरूमा पनि नयाँ किसिमको संकट देखिएको छ। इरान, इजरायल र लेबनानको आकाशमा मिसाइल आक्रमणहरू जारी छन्। इरानमा भएको बमबारीमा एउटा विद्यालय ध्वस्त भएको छ। उता, इजरायलको मध्य क्षेत्रमा सायरन बजिरहेका छन्। लेबनानमा रकेट, मिसाइल र ड्रोन आक्रमण जारी छन्।
यसबीच अमेरिकी रक्षा मुख्यालय (पेन्टागन) ले संकेत दिएको छ कि मध्यपूर्वमा ८२औँ एयरबोर्न डिभिजनका प्याराट्रूपर्स पठाउन अनुमति दिइएको छ।
अल जजिरा, द टाइम्स अफ इजरायल र सीबीएस न्यूजका रिपोर्टहरू अनुसार, आज बिहान इरानको राजधानीको पूर्वी भागमा विस्फोटका आवाज सुनिएका छन् र बमबारीका कारण आवासीय भवनहरू तथा एक विद्यालय नष्ट भएको छ। उता, इजरायली सेनाले इरानबाट देशको मध्य भागतर्फ मिसाइल आक्रमण भएको पुष्टि गरेको छ, जसपछि मध्य इजरायलमा हवाई आक्रमणको चेताउनी सायरन बज्न थाले।
इरान र हिज्बुल्लाहले इजरायलको राजधानी तेल अवीव तथा उत्तरी क्षेत्रमा मिसाइल आक्रमण गरेका छन्। यस आक्रमणमा कम्तीमा एक जनाको मृत्यु भएको छ भने एक दर्जनभन्दा बढी घाइते भएका छन्। त्यसको प्रत्युत्तरमा इजरायली सेनाले दक्षिणी लेबनानमा हिज्बुल्लाहका ठेगानामा सटीक आक्रमण गरेको छ।
समाचारमा उल्लेख भएअनुसार, इराकी समूह “इस्लामिक रेसिस्टेन्स” ले पछिल्ला २४ घण्टामा अमेरिकी ठेगानामाथि २३ आक्रमण गरेको दाबी गरेको छ। यो समूह इरान समर्थित मिलिसिया सञ्जाल हो, जसमा शक्तिशाली समूह कताइब हिज्बुल्लाह पनि समावेश छ।
कुवेत अन्तरराष्ट्रिय विमानस्थलमा ड्रोन आक्रमणपछि इन्धन ट्याङ्कीमा आगलागी भएको पुष्टि कुवेतको नागरिक उड्डयन प्राधिकरणले गरेको छ। जोर्डनको राजधानी अमानको दक्षिणमा कम जनसंख्या भएको क्षेत्रमा मिसाइलका टुक्रा खसेको जानकारी आएको छ। साउदी अरबको रक्षा मन्त्रालयले पूर्वी प्रान्तमा एक ब्यालिस्टिक मिसाइल र कम्तीमा ६ वटा ड्रोनलाई खसालिएको जनाएको छ। इजरायलको उत्तरी शहर किर्यात शमोना र छेउछाउका क्षेत्रमा हवाई आक्रमणको चेताउनी जारी गरिएको छ।
सीबीएस न्यूजले अमेरिकी रक्षा विभागका उच्च स्रोतलाई उद्धृत गर्दै अमेरिका मध्यपूर्वमा आफ्ना प्याराट्रूपर्स पठाउने निर्णय गरेको जनाएको छ। पेन्टागनले ८२औँ एयरबोर्न डिभिजनका सैनिकहरू पठाउने तयारी गरेको छ। यो निर्णय राष्ट्रपति डोनाल्ड ट्रम्प, उपराष्ट्रपति जेडी भान्स, विदेशमन्त्री मार्को रुबियो तथा दूत स्टिभ विटकफ र जेरेड कुशनरबीच लामो छलफलपछि लिइएको बताइएको छ।
अमेरिकाले होर्मुज जलडमरूमध्य बन्द रहेको अवस्थाप्रति पनि चिन्ता व्यक्त गरेको छ।
---------------
हिन्दुस्थान समाचार / भवानी थामी
