इम्फाल, २९ मार्च (हि.स.)। मणिपुर पुलिस र सुरक्षा बलहरूले राज्यका फरक-फरक भागहरूमा सञ्चालित अभियानहरूका क्रममा उग्रवादीहरूको पक्राउ, हतियार तथा गोला-बारुद बरामदगीसँगै मादक पदार्थ तस्करी गर्ने तस्करहरूको पनि निरन्तर पक्राउ जारी छ। यसैक्रममा दुई उग्रवादीहरूको पक्राउ भएको छ भने भारी मात्रामा मादक पदार्थ बरामद गरिएको छ।

मणिपुर पुलिस मुख्यालयले आइतबार दिएको आधिकारिक जानकारी अनुसार, २८ मार्चमा सुरक्षा बलहरूले प्रतिबन्धित संगठन यूपीपीकेको एक सक्रिय क्याडर खारीबाम बोयनाओ मेइतेई उर्फ लमङ्गकपा (३२) लाई उनको निवासबाट पक्राउ गरे। पक्राउ आरोपी इम्फाल पूर्वी जिल्लाको सगोलमाङ थानाअन्तर्गत ईशिङ्थेम्बी मपाल लेइकाईका बासिन्दा बताइएको छ।

यसै दिन सुरक्षा बलहरूले प्रतिबन्धित संगठन आरपीएफ/पीएलएको जबरन वसूलीमा संलग्न एक सक्रिय क्याडर थोकचोम खेलजित मेइतेई उर्फ क्यानी (४८) लाई इम्फाल पूर्वी जिल्ला पोरोम्पट थानाअन्तर्गत हप्ता काङ्जीबुङ क्षेत्रबाट पक्राउ गरे। आरोपी इम्फाल पश्चिम जिल्लाको लाम्फेल थानाअन्तर्गत नाओरेमथोङ खुमानथेम लेइकाईका बासिन्दा हुन्।

यसबीच शनिबार सुरक्षा बलहरू र एनसीबीको संयुक्त टोलीले चुराचान्दपुर जिल्लाको नगाथल मैदान क्षेत्रबाट एक डीआई टाटा र एक स्कोर्पियो रोकेर तलाशी गर्दा भेटिएको मादक पदार्थपछि दुई चालकहरूलाई पक्राउ गरेको छ। जसको पहिचान पौमुआनलियान तुङ्नुङ (२३) र लियानमिनथाङ नेहसियाल (२६) को रूपमा भएको छ।

उनीहरूका सवारीहरूबाट लुकाएर ल्याइँदै गरेको हेरोइनले भरिएका २०७ साबुनदानी बरामद गरियो जसको मूल्य करोडौं रुपियाँ आँकीएको छ।

पुलिस स्रोतहरूका अनुसार, २७ मार्चमा सुरक्षा बलहरूले जिरीबाम जिल्लाको डिबोङ अवाङ लेइकाईका मोइराङ्थेम बिजेन सिंह (५५) लाई जिरीबाम थानाअन्तर्गत क्षेत्रबाट पक्राउ गरे। उनको कब्जाबाट दुई ३६ नम्बरका हातगोला र विभिन्न क्यालिबरका पाँच राउन्ड कारतूस बरामद गरियो। पुलिसले सबै घटनाहरूमा अनुसन्धान जारी राखेको छ।

---------------

हिन्दुस्थान समाचार / भवानी थामी