चण्डीगढ़, 07 मार्च (हि.स.)। पंजाब-हरियाणा उच्च अदालतले महत्वपूर्ण फैसला सुनाउँदै डेरा सच्चा सौदाका प्रमुख गुरमीत राम रहीमलाई पत्रकार हत्या काण्डमा बरी गरेको छ। यो फैसला शनिबार बिहान मुख्य न्यायाधीश शील नागू तथा न्यायाधीश वीरेंद्र अग्रवालको खण्डपीठले सुनाएको हो।
उच्च अदालतको यो निर्णय करिब सात वर्षअघि सीबीआई अदालतले पत्रकार रामचन्द्र छत्रपति हत्या प्रकरणमा राम रहीमलाई दोषी ठहराएपछि आएको हो। रामचन्द्र छत्रपतिको हत्या सन् 2002 मा भएको थियो।
लामो अनुसन्धानपछि यो मुद्दा सीबीआईलाई सुम्पिएको थियो, जसले राम रहीमसहित अन्य व्यक्तिविरुद्ध हत्या मुद्दा चलाएको थियो। राम रहीम हाल अन्य मुद्दामा जेल सजाय भोगिरहेका छन्, जसमा बलात्कार र अन्य अपराधसम्बन्धी आरोपहरू पनि समावेश छन्।
उच्च अदालतको नयाँ निर्णय लामो समयदेखि चलिरहेको छत्रपति हत्या प्रकरणमा ठूलो कानुनी मोडको रूपमा हेरिएको छ। सीबीआई अनुसन्धानपछि सन् 2019 मा उनी दोषी ठहरिएका थिए।
रामचन्द्र छत्रपति सिरसाबाट एउटा समाचार निकाल्ने गर्थे। उनले डेरासँग सम्बन्धित विभिन्न समाचारलाई प्रमुखताका साथ उठाएका थिए। सबैभन्दा पहिले साध्वी यौन शोषण प्रकरणको समाचार उनले आफ्नै स्थानीय समाचार पत्रमा प्रकाशित गरेका थिए। त्यसको केही समयपछि उनको हत्या गरिएको थियो।
उच्च अदालतले शनिबार राम रहीमलाई यस प्रकरणमा बरी गर्दै अन्य तीन दोषी कुलदीप सिंह, निर्मल सिंह र कृष्णलालको अपील भने खारेज गर्दै उनीहरूको सजाय यथावत् राखेको छ।
---------------
हिन्दुस्थान समाचार / भवानी थामी
