कोलकाता, 10 अप्रेल (हि.स.)। विधानसभा चुनाउअघि पश्चिम बङ्गालमा ठुलो राजनीतिक घटनाक्रम अघि आएको छ। असदुद्दीन ओवेसीको पार्टी मजलिस-ए-इत्तेहादुल मुस्लिमीनले हुमायूँ कबीरको पार्टीसँगको गठबन्धन तोडेको छ र राज्यमा एक्लै लड्ने निर्णय गरेको छ।
शुक्रबार बिहान सोसल मिडियामा जारी गरिएको विज्ञप्तिमा पार्टीले मुस्लिम समुदायको आत्मसम्मानमाथि प्रश्न उठाउने कुनै पनि विवाद वा बयानसँग आफूलाई जोड्न नसक्ने बताएको छ। हुमायूँ कबीरको पार्टीसँगको गठबन्धन आजदेखि समाप्त भएको विज्ञप्तिमा स्पष्ट पारिएको छ।
यो निर्णय हुमायूँ कबीर संलग्न कथित गोप्य भिडियो विवादसँग जोडिएको रूपमा हेरिएको छ। वक्तव्यमा कुनै विशेष घटनाको उल्लेख नभए पनि यस विवादपछि दुई पक्षबिचको दूरी बढेको विश्वास गरिएको छ।
गठबन्धन टुटेकोमा प्रतिक्रिया दिँदै हुमायूँ कबीरले भने, ओवेसी आफ्नै निर्णय लिन स्वतन्त्र छन् र उनी यसमा टिप्पणी गर्न चाहँदैनन्। उनले भने, उनीसँग ओवेसीप्रति व्यक्तिगत सम्मान थियो र रहनेछ। 25 मार्चमा कोलकातामा आयोजित संयुक्त पत्रकार सम्मेलनमा दुवै पार्टीले एकसाथ चुनाउ लड्ने निर्णय गरेको पनि उनले जानकारी दिए।
हुमायूँ कबीरले आफ्नो पार्टीले 182 सिटमा लड्ने र अभियान जारी रहने पनि बताए। उनले आफ्नो पार्टीले राम्रो प्रदर्शन गर्ने र जनताको समर्थन प्राप्त गर्ने विश्वास व्यक्त गरे। उनले 'गोप्य भिडियो' बारे यो आर्टिफिसियल इन्टेलिजेन्स मार्फत तयार गरिएको र यसको प्रामाणिकता प्रमाणित भएन भने उच्च अदालतमा जाने चेताउनी दिए।
मजलिस-ए-इत्तेहादुल मुस्लिमीनले आफ्नो बयानमा पश्चिम बङ्गालको मुस्लिम समुदाय लामो समयदेखि गरिब, उपेक्षित र शोषित रहेको र उनीहरूको पार्टीले त्यस्ता वर्गहरूलाई स्वतन्त्र राजनीतिक आवाज दिने लक्ष्य राखेको बताएको छ। यसैकारण पार्टीले राज्यमा कुनै पनि दलसँग गठबन्धन नगर्ने र एक्लै चुनाउ लड्ने निर्णय गरेको छ।
उल्लेख्य, दुई दलबीचको गठबन्धनले पहिले राज्यमा अल्पसङ्ख्यक मत समीकरणलाई असर गर्ने विश्वास गरिएको थियो। तर, अब यो गठबन्धन टुटेको कारण चुनावी समीकरणमा परिवर्तन आउने अपेक्षा गरिएको छ।
हिन्दुस्थान समाचार / भवानी थामी
