कोलकाता, 10 अप्रेल (हि.स.)। राशन वितरणमा कथित अनियमिततालाई लिएर पश्चिम बंगालमा प्रवर्तन निर्देशनालय फेरि एक पटक सक्रिय भएको छ। शुक्रवार बिहानदेखि धेरै जिल्लाहरूमा एकैसाथ छापा मारिएको छ।

सूत्रहरू अनुसार, कोलकाता, हावड़ा, बनगाउँ र मुर्शिदाबाद सहित राज्यभरि कूल 12 स्थानमा खोजी भइरहेको छ। अनुसन्धान एजेन्सीले राशन वितरण प्रक्रिया र सम्बन्धित वित्तीय लेनदेनको अनुसन्धान गरिरहेको छ।

प्रवर्तन निर्देशनालयका अधिकारीहरू आज बिहान कोलकाताको बसन्त कुमार रोड स्थित एक व्यापारीको घरमा पुगे। राशन वितरणका तरीकाहरू र आपूर्ति सञ्जालको बारेमा व्यवसायीलाई सोधपुछ गरिएको छ। शहरको पोद्दार कोर्ट र मिन्टो पार्क क्षेत्रका धेरै स्थानहरूमा पनि खोजी भइरहेको छ।

प्रवर्तन निर्देशनालयले रानीगञ्जमा अजय कोयाल नामक व्यापारीको घरमा पनि छापा मारेको छ। अजय कोयालको रानीगञ्जमा लामो समयदेखि चामलको व्यवसाय छ, जुन राज्य बाहेक देशका अन्य भागहरूमा फैलिएको बताइएको छ। रिपोर्टका अनुसार, उनी विदेशमा पनि चामल आपूर्ति गर्छन्।

शुक्रवार बिहान अधिकारीहरू चार वटा गाड़ीमा केन्द्रिय बलहरूसँगै आइपुगे र अजय कोयालको निवासमा खोजी अभियान शुरु गरे। यो कारबाही राशन घोटाला मुद्दामा महत्त्वपूर्ण मानिन्छ र भविष्यमा थप खुलासा हुने अपेक्षा गरिएको छ।

हिन्दुस्थान समाचार / भवानी थामी