इस्लामाबाद, 12 अप्रेल (हि.स.)। अमेरिका र इरानबीचको इस्लामाबाद शान्ति वार्ता विफल भएको छ। दुई देशका प्रतिनिधिमण्डलबीचको वार्ता करिब 21 घण्टासम्म चलेको थियो। अमेरिकी प्रतिनिधिमण्डलको नेतृत्व गरिरहेका उपराष्ट्रपति जेडी भेन्स पाकिस्तानबाट स्वदेश फर्केका छन्। यसअघि आज पनि वार्ता हुने भनिएको थियो।

भेन्सले संयुक्त राज्य अमेरिका प्रस्थान गर्नु अघि पत्रकार सम्मेलनमा भने, नराम्रो खबर यो हो कि हामी सम्झौतामा पुग्न सकेनौं। उनको विचारमा यो संयुक्त राज्य अमेरिकाका लागि भन्दा इरानका लागि धेरै खराब समाचार हो। उनी कुनै सम्झौता बिना अमेरिका फर्किरहेका छन्।

फक्स न्यूजले रिपोर्टको अनुसार, उपराष्ट्रपति जेडी भेन्स 7 बजी एयर फोर्स टुमा सवार भएर संयुक्त राज्य अमेरिकाका लागि पाकिस्तानबाट प्रस्थान गरे। उनले इरानी अधिकारीहरूसँग 21 घण्टा लामो वार्ता गरेपछि यो कदम चालेका हुन्। वार्ता कुनै सहमतिमा पुग्न नसकेपछि समाप्त भयो।

भेन्सले आइतबार बिहान पत्रकार सम्मेलनमा इरानले शर्तहरू स्वीकार नगर्ने निर्णय गरेको बताए। अमेरिकाले अपरेसन एपिक फ्युरी शुरु गरेको एक महिनाभन्दा बढी समयपछि इरानसँग वार्ताको नेतृत्व गर्न उपराष्ट्रपति शनिबार बिहान पाकिस्तान आइपुगेका थिए।

डन अखबारका अनुसार, दुई देशबीचको प्रत्यक्ष वार्तापछि भेन्सले यहाँ पत्रकार सम्मेलनलाई सम्बोधन गरे। उनले भने, हामीले विगत 21 घण्टादेखि यसमा काम गरिरहेका छौँ र हामीले गम्भीर छलफल गरेका छौँ। नराम्रो खबर यो हो कि हामी सम्झौतामा पुग्न सकेनौं। उपराष्ट्रपतिले भने, हामीले हाम्रो लक्ष्य के हो भनेर स्पष्ट पारेका छौँ। हामीले इरानबाट के स्वीकार गर्न इच्छुक छौं भनेर पनि स्पष्ट गर्यौँ। तर, इरानी प्रतिनिधिमण्डलले हाम्रा शर्तहरू स्वीकार गर्न अस्वीकार गरेको छ।' भेन्सले पत्रकार सम्मेलनको शुरुमा पाकिस्तानका प्रधानमन्त्री शाहबाज सरिफ र सेना प्रमुख फिल्ड मार्शल असीम मुनीरलाई उत्कृष्ट आयोजक का रूपमा प्रशंसा गरे।

उनले यो पनि स्पष्ट पारे कि पाकिस्तानले हामी बिचको खाडल कम गर्न र सम्झौतामा पुग्न मध्यस्थकर्ताको रूपमा राम्रो काम गर्यो र वास्तवमै मद्दत गर्ने प्रयास गर्यो। जब भेन्सलाई इरानले के अस्वीकार गर्यो भनेर सोधिएको थियो उनले भने, म सबै विवरणहरूमा जान चाहन्नँ, किनकि म 21 घण्टाको निजी वार्तापछि सार्वजनिक रूपमा कुरा गर्न चाहन्नँ। तर सरल शब्दमा भन्नुपर्दा हामीलाई दृढ आश्वासन चाहिन्छ कि उनीहरूले आणविक हतियारहरू निर्माण गर्न खोज्दैनन्, न त उनीहरूले द्रुत रूपमा आणविक हतियारहरू प्राप्त गर्न सक्ने साधनहरू प्राप्त गर्न खोज्नेछन्।

यसैबीच, इरानको विदेश मन्त्रालयका प्रवक्ता इस्माइल बाकाईले एक्समा लेखेका छन्, इस्लामाबादमा प्रतिनिधिमण्डलका लागि यो व्यस्त र लामो दिन थियो। यस अवधिमा दुई पक्षबीच धेरै सन्देश र कागजात आदानप्रदान भयो। वार्ताका मुख्य विषयहरू स्ट्रेट अफ होर्मुज, आणविक मुद्दा, युद्ध क्षतिपूर्ति, प्रतिबन्धहरू हटाउनु र युद्धको पूर्ण समाप्ति थिए।

---------------

हिन्दुस्थान समाचार / भवानी थामी