काठमाडौं, 0२ अप्रेल (हि.स.)। प्रधानमन्त्री बालेन्द्र शाहले सिंहदरबारमा लामो समयदेखि रहेको सुस्तता र नौकरशाही जडतालाई तोड्न नयाँ रिपोर्टिङ प्रणाली लागू गरेका छन्। प्रधानमन्त्री शाहले मन्त्रीहरू र उच्च पदस्थ कर्मचारीहरूलाई एउटै मापदण्डमा राख्दै हरेक दिनको कामको विवरण साँझसम्म पेश गर्न निर्देशन दिएका छन्।
प्रधानमन्त्री तथा मन्त्रिपरिषद् कार्यालयले सोमबार सबै मन्त्रालय, विभाग र आयोगहरूलाई पत्र पठाएर दिनभर गरिएका सबै कामहरूको विवरण उपलब्ध गराउन निर्देश दिएको छ। मुख्य सचिव सुमनराज अर्यालले यसको पुष्टि गर्दै सबै मन्त्रालय, विभाग तथा अन्य सरकारी निकायहरूले यस सम्बन्धमा पत्र प्राप्त गरिसकेको जानकारी दिएका छन्।
दिनभरको कामको विवरण प्रधानमन्त्री कार्यालयमा पठाउनका लागि प्रायः सबै मन्त्रालयहरूले ‘फोकल पर्सन’ नियुक्त गरिसकेका छन्। मुख्य सचिव अर्यालका अनुसार, यो जिम्मेवारी सहसचिव तहका अधिकारीहरूलाई दिइएको छ।
सरकारले यसअघि नै सुशासन सुधारसम्बन्धी १०० बुँदे कार्यसूची सार्वजनिक गरिसकेको छ। प्रधानमन्त्री शाह अहिले यी बुँदाहरूको कार्यान्वयनको दैनिक समीक्षा गरिरहेका छन्। सरकारका प्रवक्ता तथा शिक्षा मन्त्री सस्मित पोखरेलका अनुसार, प्रधानमन्त्रीले कार्य मूल्यांकनको आधार पनि यहीलाई बनाएका छन्।
पोखरेलले भने, “प्रधानमन्त्रीले सुधार प्रक्रियालाई अगाडि बढाइरहेका छन्। १०० बुँदे सरकारी कार्यसूचीका आधारमा सबै मन्त्रालयहरूले आफ्ना कामको प्रगति प्रतिवेदन हरेक साँझ मन्त्रिपरिषद् कार्यालयमा बुझाउनुपर्नेछ, र यसको कार्यान्वयन शुरु भइसकेको छ।”
फोकल पर्सन बनाइएका सहसचिवहरू अब हरेक दिन कार्यालय समय सकिनुअघि कामको विवरण तयार गर्न थालेका छन्। एक अधिकारीका अनुसार, प्रत्येक दिन गरिएका कामहरूको प्रतिवेदन साँझसम्म प्रधानमन्त्री कार्यालयमा पठाइँदैछ। प्रधानमन्त्रीले ‘टास्क’ निर्धारण गरी पत्र जारी गरेपछि मन्त्रीहरू पनि आफ्नो कार्य प्रदर्शनप्रति सक्रिय भएका छन्। केही मन्त्रीहरू त कार्यालय समयअघि नै सिंहदरबार पुग्न थालेका छन्।
---------------
हिन्दुस्थान समाचार / भवानी थामी
02 Apr 2026
