– पवन खेड़ाले झुटा र मनगढन्ते आरोप लगाए, एफआईआर दर्ताः मुख्यमन्त्री
गुवाहाटी, ०६ अप्रेल (हि.स.)। असममा राजनीतिक विवाद त्यतिबेला अझ चर्कियो, जब मुख्यमन्त्री डा. हिमन्त बिस्व सरमाले कांग्रेस नेताहरूले बनावटी कागजात प्रयोग गरी निर्वाचन प्रक्रियालाई प्रभावित गर्न खोजेको आरोप लगाए। साथै उनले यस प्रकरणमा पाकिस्तानसँग सम्बन्ध रहेको आरोप पनि लगाएका छन्।
सोमबार अटल बिहारी वाजपेयी भवनमा आयोजित पत्रकार सम्मेलनलाई सम्बोधन गर्दै डा. सरमाले भने, पवन खेड़ा र गौरव गोगोईले दुईवटा समन्वित पत्रकार सम्मेलन गरे, एक दिल्लीमा र अर्को गुवाहाटीमा, जुन “नक्कली सामग्री” मा आधारित थिए। उनका अनुसार, यस्ता कागजात सार्वजनिक रूपमा प्रस्तुत गर्नु ठगी र जालसाजीसम्बन्धी कानुनअन्तर्गत गम्भीर अपराध हो, जसमा भारतीय न्याय संहिता (बीएनएस) का धाराहरू पनि लागू हुन सक्छन्।
उल्लेख्य, पवन खेड़ाले आइतबार पत्रकार सम्मेलनमा मुख्यमन्त्रीकी पत्नीको नाममा तीन फरक देशका पासपोर्ट रहेको, अमेरिकामा हजारौं करोड़को कम्पनी रहेकोजस्ता गम्भीर आरोप लगाउँदै केही तस्वीरहरू सार्वजनिक गरेका थिए। त्यसपछि राज्यको राजनीतिमा तीव्र हलचल मच्चिएको थियो। यो विषय सार्वजनिक हुनासाथ मुख्यमन्त्री सरमाले ‘एक्स’ मार्फत यसलाई पूर्ण रूपमा अस्वीकार गर्दै झुटो बताएका थिए र पवन खेड़ाविरुद्ध आपराधिक तथा दिवानी दुवै किसिमका मुद्दा दर्ता गरिने बताएका थिए। मुख्यमन्त्रीले आज यस सम्बन्धमा पुलिसमा मुद्दा दर्ता गरिएको जानकारी दिएका छन्।
मुख्यमन्त्रीले भने, उनलाई दुःख लागेको छ कि तरुण गोगोईका छोरा गौरव गोगोई सत्ताका लागि यति तल झरेका छन्। उनले थपे, यदि पाकिस्तानको समर्थनमा यस्ता झुटा आरोप अगाडि बढाइएको हो भने यो झन् गम्भीर विषय हो र देशद्रोहको श्रेणीमा पर्न सक्छ। पुलिसले यस विषयमा अनुसन्धान गरिरहेको छ। साथै उनले पवन खेड़ाले गरेको अपराधका लागि आजीवन कारावाससम्म सजाय हुन सक्ने दाबी गरे र खेड़ाले आफ्नो जीवन असमकै जेलमा बिताउनुपर्ने स्थिति आउन सक्ने बताए। उनले अधिकांश पोस्टहरू पाकिस्तानबाट आएको पनि दाबी गरे।
उनले भने, चुनाउको परिणामलाई प्रभावित गर्ने उद्देश्यले बनावटी कागजात प्रयोग गर्नु अझ गम्भीर अपराध हो, जसमा आजीवन कारावाससम्म सजाय हुन सक्छ। डा. सरमाले यो विषय अब केवल राजनीतिक मात्र नभई कानुनी रूपमा पनि गम्भीर बनेको बताए।
मुख्यमन्त्रीले यो पनि जानकारी दिए कि उनकी पत्नी रिनिकी भुइयां सरमाले यस सम्बन्धमा एफआईआर दर्ता गराएकी छन्। उनले पुलिसद्वारा यी दाबी र कागजातको स्रोतबारे विस्तृत अनुसन्धान हुने विश्वास व्यक्त गरे।
अर्को गम्भीर आरोप लगाउँदै डा. सरमाले खेड़ाको पत्रकार सम्मेलनमा प्रस्तुत सामग्रीको स्रोत पाकिस्तानी सामाजिक सञ्जाल प्रणालीसँग सम्बन्धित रहेको दाबी गरे। उनले भने, पछिल्ला १० दिनमा पाकिस्तानी च्यानलहरूले असम चुनाउबारे असामान्य रूपमा धेरै बहस प्रसारण गरेका छन्, जुन पहिले कहिल्यै नभएको बताउँदै ती बहसहरूमा कांग्रेसको पक्षमा निरन्तर कथानक प्रस्तुत गरिएको आरोप लगाए। उनका अनुसार, पछिल्लो पत्रकार सम्मेलनको पछाडि “पाकिस्तानसँगको सम्बन्ध” अझ स्पष्ट भएको छ।
आफ्ना आरोपलाई थप स्पष्ट पार्दै डा. सरमाले असम भाजपा ले “GauravElizabeth786” नामक नक्कली एकाई सिर्जना गरेको बताए, जसबाट अनलाइनमा नक्कली कम्पनी वा डिजिटल अभिलेख कति सजिलै बनाउन सकिन्छ भन्ने देखाउन खोजिएको हो। उनले यस्ता प्रयोगले भ्रामक जानकारी कसरी तयार पारिन्छ र गुगलजस्ता सार्वजनिक प्लेटफर्ममा छिटो फैलिन सक्छ भन्ने कुरा उजागर गर्ने बताएका छन्।
---------------
हिन्दुस्थान समाचार / भवानी थामी
07 Apr 2026
