नयाँ दिल्ली, ०६ अप्रेल (हि.स.)। भारतीय जनता पार्टी (भाजपा) ले आज आफ्नो स्थापना दिवस मनाइरहेको छ। ६ अप्रेल, १९८० मा पार्टीको स्थापना गरिएको थियो। भाजपाका राष्ट्रिय अध्यक्ष नितिन नवीनले सबै कार्यकर्ता र देशवासीलाई शुभकामना दिएका छन्। यस अवसरमा देशभर पार्टीका तर्फबाट विभिन्न कार्यक्रमहरू आयोजना भइरहेका छन्।

यस अवसरमा नितिन नवीनले आफ्नो ‘एक्स’ खातामार्फत एक भिडियो सार्वजनिक गर्दै लेखेका छन्, “भाजपा स्थापना दिवसको पावन अवसरमा विश्वकै सबैभन्दा ठूलो राजनीतिक दलका सबै समर्पित कार्यकर्ताहरूलाई हार्दिक शुभकामना। जनसंघ कालदेखि आज विश्वकै सबैभन्दा ठूलो पार्टी बन्नेसम्मको यो यात्रा असंख्य कार्यकर्ताहरूको त्याग, तपस्या र बलिदानको कथा हो। डा. श्यामा प्रसाद मुखर्जी र पण्डित दीनदयाल उपाध्यायको ‘अन्त्योदय’ को सपना लिएर हामी अघि बढेका थियौं, आज प्रधानमन्त्री नरेन्द्र मोदीको नेतृत्वमा त्यो सपना धरातलमा साकार भइरहेको छ।”

उनले कार्यकर्ताहरूलाई आह्वान गर्दै भने, स्थापना दिवसको अवसरमा ‘राष्ट्र पहिलो’ को संकल्प पुनः दोहोर्याऔं र ‘विकसित भारत’ निर्माणका लागि पूर्ण ऊर्जा सहित जुटौं। भाजपा स्थापना दिवसका अवसरमा केन्द्रिय मन्त्री शिवराज सिंह चौहान, जेपी नड्डा, किरेन रिजिजू, राजनाथ सिंह लगायतका नेताहरूले पनि शुभकामना दिएका छन्।

यसरी नै योगी आदित्यनाथसहित विभिन्न राज्यका मुख्यमन्त्रीहरूले पनि शुभकामना व्यक्त गरेका छन्। नेताहरूले पार्टीको विचारधारा, ‘राष्ट्र पहिलो’ को संकल्प र अन्त्योदयको लक्ष्यलाई दोहोर्याउँदै जनसेवा र विकसित भारत निर्माणप्रति प्रतिबद्धता व्यक्त गरेका छन्।

---------------

हिन्दुस्थान समाचार / भवानी थामी