बारपेटा, ०६ अप्रेल (हि.स.)। भारतीय जनता पार्टीका वरिष्ठ नेता तथा प्रधानमन्त्री नरेन्द्र मोदीले सोमबार असमको बारपेटामा आयोजित चुनावी सभालाई सम्बोधन गर्दै राज्यका जनताले यसपटक दुई ठूला निर्णय गरिसकेको बताएका छन्, पहिलो, भाजपा-राजग सरकारको हैट्रिक जित र दोस्रो, कांग्रेसको “शाही परिवार” का नेताको हारको नयाँ रेकर्ड बनाउने।

प्रधानमन्त्रीले भने, असमका जनताको उत्साह, ऊर्जा र आशीर्वाद अभूतपूर्व रहेको छ। उनले यसपटक राज्यमा “ऊर्जावान” भाजपा नेतृत्वको राजग सरकार बन्ने विश्वास व्यक्त गरे। उनले कांग्रेसमाथि आरोप लगाउँदै भने,

पार्टीसँग विकासका लागि दीर्घकालीन दृष्टिकोणको अभाव छ र त्यो केवल अल्पकालीन लाभ तथा भ्रष्टाचारमा केन्द्रित रहेको छ।

प्रधानमन्त्रीले कांग्रेसले आदिवासी समुदायमाथि “सबैभन्दा ठूलो अन्याय” गरेको आरोप लगाए। उनले भने, कांग्रेसको लामो शासनकालमा आदिवासी क्षेत्रमा गरिबी, हिंसा र असुरक्षाका समस्या सबैभन्दा बढी थिए।

उनले कांग्रेसमाथि घुसपैठियाहरूलाई खुलेर समर्थन गरेको र अवैध कब्जाविरुद्धको कारबाहीको विरोध गरेको आरोप लगाए। मोदीले भने, कांग्रेसले यस्तो कानुन ल्याउने कुरा गरिरहेको छ, जसमा “घुसपैठिया” शब्द प्रयोग गर्नु पनि अपराध हुन सक्छ र उनीहरूलाई पीडितका रूपमा प्रस्तुत गरिन सक्छ, जसले असमका मूल बासिन्दा र जनजातीय समुदायलाई कानुनी जोखिममा पार्न सक्छ।

मोदीले भने, भाजपा सरकार “विकसित असम” को लक्ष्यसहित “विकसित भारत” निर्माणतर्फ काम गरिरहेको छ। पछिल्ला १० वर्षमा असमलाई भय र अस्थिरताबाट बाहिर निकाल्ने, शान्ति स्थापना गर्ने र यसको पहिचान जोगाउने काम गरिएको छ। आउने दशक असमलाई आत्मनिर्भर बनाउने र यसको पहिचानलाई अन्तरराष्ट्रिय स्तरमा स्थापित गर्ने हुनेछ।

प्रधानमन्त्रीले किसानको विषयमा पनि कांग्रेसको आलोचना गरे। उनले भने, २०१४ भन्दा अघिका १० वर्षमा धान किसानहरूले न्यूनतम समर्थन मूल्य (एमएसपी) अन्तर्गत करिब ४ लाख करोड़ रुपियाँ पाएका थिए, जबकि २०१४ पछि यो रकम बढेर १६ लाख करोड़ रुपियाँ पुगेको छ। उनले बताए, २०१३ मा धानको एमएसपी १३०० रुपियाँ प्रति क्विन्टल थियो, जुन अहिले बढेर करिब २३७० रुपियाँ प्रति क्विन्टल पुगेको छ।

भाजपा स्थापना दिवसको अवसरमा प्रधानमन्त्रीले देश-विदेशमा रहेका सबै कार्यकर्ताहरूलाई बधाई दिए। उनले भने, “राष्ट्र पहिलो” को मन्त्रसहित पार्टी मातृभूमिको सेवामा समर्पित छ र आत्मनिर्भर भारतको संकल्पलाई अघि बढाइरहेको छ।

मोदीले महिला आरक्षण विधेयकको उल्लेख गर्दै सरकारले सबै दलको सहयोगमा यसलाई अघि बढाइरहेको बताए। उनले महिलाको अधिकार सुदृढ़ गर्न सरकार प्रतिबद्ध रहेको बताए। उनले भने, सरकारले १६ अप्रेलदेखि शुरु हुने संसदको विशेष अधिवेशन बोलाएको छ र यस विषयमा सबै राजनीतिक दलसँग छलफल गरिएको छ। उनले सबैलाई यो विषय सर्वसम्मत रूपमा अघि बढाउन आग्रह गरेका छन्। केही व्यक्तिहरूले यसबारे भ्रम फैलाउने प्रयास गरिरहेको पनि उनले बताए। उनले भने, यसबाट देशका सबै राज्यलाई फाइदा हुनेछ र कुनै पनि राज्यलाई घाटा हुने छैन। उत्तरपूर्व होस् वा दक्षिण भारत, जहाँ जनसंख्या नियन्त्रणको अभ्यास छ, त्यहाँको प्रतिनिधित्वमा कुनै कमी आउने छैन। महिलाका लागि थप सिट व्यवस्था गरिनेछ र हालको सिट संख्या बढाउनुपर्ने आवश्यकता रहेको उनले बताए।

उनले भने, अप्रेल महिना असममा बोहाग बिहू पर्वको उत्सव ल्याउने महिना हो र यसपटक यो लोकतन्त्रको पर्वसँग पनि जोडिएको छ, किनकि मतदान नजिकिँदैछ।

प्रधानमन्त्रीले भने, कांग्रेस कहिल्यै जनतामाझ आफ्नो कामको रिपोर्ट लिएर जाँदैन, जबकि भाजपा सरकार पारदर्शितासहित आफ्ना कामको हिसाब दिन्छ। उनले कांग्रेसमाथि सशस्त्र बलको अपमान गरेको आरोप पनि लगाए। उनले एयर स्ट्राइक र सर्जिकल स्ट्राइकपछि कांग्रेसले प्रश्न उठाएको उल्लेख गरे। उनले “वन र्याङ्क वन पेंशन” को विषयलाई सैनिकहरूप्रतिको कांग्रेसको “विश्वासघात” को उदाहरणका रूपमा प्रस्तुत गरे।

उनले भने, यसपटक जनताको मतले “विकसित असम” को आधारलाई अझ बलियो बनाउनेछ र राज्यलाई नयाँ उचाइमा पुर्याउनेछ। प्रधानमन्त्रीले भने, भाजपालाई दिइएको प्रत्येक मतले असमको पहिचान र सुरक्षालाई मजबुत बनाउनेछ। उनले दाबी गरे, वर्षौँको प्रयास र बलिदानपछि असममा शान्ति फर्किएको छ र यसलाई कायम राख्न कांग्रेसलाई सत्ताबाट टाढा राख्नु आवश्यक छ।

---------------

हिन्दुस्थान समाचार / भवानी थामी