खरसाङ, 29 मई (हि.स.)। गोर्खा राष्ट्रिय मुक्ति मोर्चा खरसाङ ब्राञ्च कमिटी अन्तर्गत टुङ सन्तमेरिज समष्टिको सांगठनिक सभा आज स्थानीय सार्वजनिक भवनमा सम्पन्न भयो। समष्टि अध्यक्ष मदन छेत्रीको अध्यक्षतामा सम्पन्न उक्त सभामा एचपीडब्ल्यु केन्द्रिय समिति अध्यक्ष बीके राई, केन्द्रिय सदस्य अमृता थापा, एचपीडब्ल्यु खरसाङ ब्राञ्च कमिटी अध्यक्ष अदिप राई, खरसाङ ब्राञ्च कमिटी प्रचार प्रसार सचिव भुपेन गुरुङ, सोनादा टाउन कमिटी अध्यक्ष रुस्तम छेत्री आदि उपस्थित थिए।

समष्टि सचिव सन्तोष सुब्बाले गोरामुमोको राजनीतिक सिद्धान्त, गोर्खा जातिको राजनीतिक अधिकार तथा पहिचानको मुद्दालाई भारत सरकारसमक्ष सशक्त ढंगले पुर्याउन पार्टी अध्यक्ष मन घिसिङले इमानदार नेतृत्व प्रदान गरिरहेको बताए। उनले लामो समयदेखि निष्क्रिय रहेका पुराना सदस्यहरू समेत पुनः सक्रिय बन्दै संगठन विस्तार तथा जनसम्पर्क अभियानमा सहभागी हुन अग्रसर भएको जानकारी गराए।

सभामा समष्टि अन्तर्गत शाखा प्रशाखाका प्रतिनिधिवर्गलाई संगठन विस्तार, जनसम्पर्क अभियान तथा आगामी राजनीतिक रणनीतिबारे विस्तृत दिशानिर्देशनसहित व्यापक छलफल गरिएको बताइएको छ। सभामा वक्ताहरूले हालै सम्पन्न निर्वाचनमा भाजपा गठबन्धनका उम्मेदवारलाई समर्थन गर्दै विजयी गराएकोमा समष्टिवासी जनताप्रति आभार प्रकट गरे।

वक्ताहरूले उक्त जीत सम्पूर्ण गोर्खा जातिको राजनीतिक आकांक्षा र संवैधानिक समाधानको दिशामा महत्वपूर्ण उपलब्धि भएको बताए। उनीहरूले लगभग पाँच दशकपछि केन्द्र र बंगालमा एउटै गठबन्धनको प्रभावकारी समन्वय बनेको उल्लेख गर्दै गृहमन्त्री अमित शाहले संवैधानिक व्यवस्था चाँडै लागू गर्ने विषयमा गरेको घोषणाले गोर्खा समुदायमा नयाँ आशा जागेको बताए। वक्ताहरूले अब गोर्खा जातिको दीर्घकालीन राजनीतिक माग र चाहना पूरा हुने विश्वास व्यक्त गरे।

हिन्दुस्थान समाचार / हनोक