गान्तोक, 29 मई (हि.स.)। सिक्किम सरकारको मत्स्य पालन विभागले विभागको वार्षिक संरक्षण र स्रोत वृद्धि पहल अन्तर्गत 29 मईका दिन गान्तोक जिल्लाको मेंमोइत्सोमा ब्राउन ट्राउट माछाका बच्चाहरू छोड्ने र सरसफाई अभियान कार्यक्रम सफलतापूर्वक आयोजना गर्यो। यस अभियानको अगुवाई मत्स्य पालन विभागकी सचिव रोशनी राईले गरेकी थिइन्।
कार्यक्रमको शुरुमा प्राकृतिक ट्राउट जनसंख्यालाई सुदृढ पार्ने, जलीय जैवविविधता बढाउने र क्षेत्रमा माछापालन स्रोतहरूको दीर्घकालीन दिगोपन सुनिश्चित गर्ने उद्देश्यले स्वस्थ ब्राउन ट्राउट माछाका बच्चाहरू लेकमा छोडियो। मेंमोइत्सो ट्राउट फार्ममा नै उत्पादन गरिएका माछाका बच्चाहरू लेकमा छोडिएको बताइएको छ।
मत्स्य पालन विभाग अनुसार, यो कार्यक्रम प्राकृतिक जल निकायहरूमा माछाको भण्डार पुनःपूर्ति गर्ने र चिसो पानीको माछापालन स्रोतहरूको संरक्षणलाई प्रवर्द्धन गर्ने मत्स्य पालन विभागको वार्षिक पहल हो। यस्ता गतिविधिहरूले पारिस्थितिक सन्तुलन कायम राख्न, मनोरञ्जनात्मक माछा मार्ने सम्भावनालाई समर्थन गर्न र राज्यको अद्वितीय जलीय पारिस्थितिक प्रणालीको संरक्षणमा महत्त्वपूर्ण भूमिका खेल्छन्।
सचिव रोशनी राईले पवित्र बौद्ध महिना सागा दावामा माछाका बच्चाहरू छोड्ने गतिविधिमा विशेष महत्त्व थपिएको बताइन्। उनले भनिन्, यो पहल सबै जीवित प्राणीहरूप्रति करुणाको प्रतीक हो तथा जैवविविधता संरक्षण र पर्यावरणीय संरक्षणप्रति समाजको सामूहिक जिम्मेवारीलाई प्रतिबिम्बित गर्दछ।
यसपछि, मेंमोइत्सो लेक र वरपर सरसफाई अभियान सञ्चालन गरिएको थियो। विभागका अधिकारी तथा कर्मचारीहरूले फोहोर सङ्कलन गरेर र पारिस्थितिक रूपमा संवेदनशील क्षेत्रहरूमा सरसर्फाइ कायम राख्नुको महत्त्वको बारेमा जागरूकता सिर्जना गरेर अभियानमा सक्रिय रूपमा भाग लिए।
हिन्दुस्थान समाचार / बिशाल
