जिनेवा/बेरुत, १९ जून (हि.स.)। अमेरिका र इरानबीच आज हुने तय भएको वार्ता स्थगित गरिएको छ। यसैबीच, अमेरिका-इरान शान्ति सम्झौताको घोषणा भए पनि लेबनानमा इजरायली आक्रमण जारी रहेको छ। पछिल्ला आक्रमणहरूमा कम्तीमा १८ जनाको मृत्यु भएको छ।

अमेरिकी समाचार च्यानल एबीसी न्यूजका अनुसार, स्विस विदेश मन्त्रालयले जारी गरेको विज्ञप्तिमा अमेरिका, इरान, कतार र पाकिस्तान बीच हुने तय भएको वार्ता स्थगित गरिएको जनाएको छ। मन्त्रालयले भविष्यमा हुने वार्तामा सहजीकरण गर्न स्विट्जरल्याण्ड तयार रहेको र बर्गेनस्टोकमा आवश्यक तयारी जारी रहेको बताएको छ।

स्विस विदेश मन्त्रालयका अनुसार, ह्वाइट हाउसले बिहीबार राति अमेरिकी उपराष्ट्रपति जेडी भान्स इरानसँग भएको समझदारीपत्र (मेमोरान्डम अफ अन्डरस्ट्यान्डिङ) कार्यान्वयनसम्बन्धी प्रारम्भिक वार्ताका लागि स्विट्जरल्याण्ड नजाने घोषणा गरेको थियो। यस निर्णयले स्विस सरकारद्वारा बैठकका लागि गरिएका तयारी प्रभावित भएका छन्।

यसअघि स्विस विदेश मन्त्रालयले अमेरिका र इरानबीच शुक्रबार प्रारम्भिक वार्ता हुने जानकारी दिएको थियो। उक्त बैठकमा मध्यस्थकर्ताको भूमिकामा रहेका पाकिस्तान र कतारका अधिकारीहरूको पनि सहभागिता रहने अपेक्षा गरिएको थियो। बैठक बर्गेनस्टोक रिसोर्ट क्षेत्रमा आयोजना हुने आशा व्यक्त गरिएको छ।

अर्कातिर, लेबनानको जनस्वास्थ्य मन्त्रालयका अनुसार दक्षिणी लेबनानका ११ वटा विभिन्न शहर तथा गाउँमा रातभरि भएका इजरायली आक्रमणमा कम्तीमा १८ जनाको मृत्यु भएको छ भने ३३ जना घाइते भएका छन्। मन्त्रालयले मृत्यु हुनेको संख्या प्रारम्भिक रहेको र लगातारको आक्रमणका कारण उद्धारकर्मीहरू पीडितसम्म पुग्न नसकेको जनाएको छ।

यसैबीच, इजरायल डिफेन्स फोर्सेसले दक्षिण लेबनानमा रातभरि सञ्चालन गरिएको कारबाहीका क्रममा आफ्ना चार सैनिक पनि मारिएको जानकारी दिएको छ।

हिन्दुस्थान समाचार / बिशाल