बुलन्दशहर/लखनउ, १९ जून (हि.स.)। उत्तर प्रदेशको एन्टी टेररिस्ट स्क्वाड (एटीएस) ले देशविरोधी गतिविधिमा संलग्न रहेको आरोपमा दुई जना संदिग्धलाई बुलन्दशहरबाट पक्राउ गरेको छ। पक्राउ परेका व्यक्तिहरू सामाजिक सञ्जालमार्फत ‘स्लीपर सेल’ तयार गर्ने, डर र आतङ्कको वातावरण सिर्जना गर्ने तथा संवेदनशील स्थानहरूको रेकी गर्ने गतिविधिमा संलग्न रहेको बताइएको छ।अपर पुलिस महानिर्देशक (कानून-व्यवस्था) अमिताभ यशले बिहीबार जारी गरेको विज्ञप्तिमा पाकिस्तानी ग्याङ्स्टर शहजाद भट्टी र आबिद जट्टको आतङ्कवादी सञ्जालविरुद्ध सञ्चालन भइरहेको अभियानअन्तर्गत उत्तर प्रदेश एटीएसले बुलन्दशहरबाट उक्त सञ्जालसँग सम्बन्धित थप दुई अभियुक्तलाई पक्राउ गरेको जानकारी दिए। पक्राउ परेका व्यक्तिहरूको पहिचान बुलन्दशहरको अकबरपुर गाउँका मोहम्मद उमर र फैजानका रूपमा भएको छ।एटीएसको प्रारम्भिक अनुसन्धान तथा प्राप्त सूचनाअनुसार, उनीहरू बुलन्दशहरमा आफ्नो वास्तविक पहिचान लुकाएर ‘स्लीपर सेल’ का रूपमा बसोबास गरिरहेका थिए। अनुसन्धानमा उनीहरू प्रत्यक्ष रूपमा पाकिस्तानी आतङ्कवादी शहजाद भट्टी र ह्यान्डलर आबिद जट्टसँग सम्पर्कमा रहेको खुलासा भएको छ।आरोपीहरूलाई पाकिस्तानी डन आबिद जट्टका पोस्टरहरू बुलन्दशहरका विभिन्न क्षेत्रमा टाँस्ने तथा त्यसका भिडियो बनाएर पठाउने जिम्मेवारी दिइएको थियो। यसको बदलामा उनीहरूलाई रकम उपलब्ध गराइने बताइएको छ। यस गतिविधिको उद्देश्य सर्वसाधारणमा डर र त्रासको वातावरण सिर्जना गर्नु रहेको सुरक्षा निकायको भनाइ छ।उनीहरूलाई सेना छावनी (आर्मी क्यान्ट) जस्ता संवेदनशील स्थानहरूको रेकी गर्ने जिम्मेवारी पनि दिइएको थियो। आरोपीहरूको साथबाट आबिद जट्टका पोस्टर, पोस्टर टाँस्दाको भिडियो तथा अन्य डिजिटल प्रमाणहरू बरामद गरिएको छ।एटीएस र अन्य सुरक्षा एजेन्सीहरूले हाल दुवै अभियुक्तसँग थप सोधपुछ गरिरहेका छन्। उनीहरूलाई पाकिस्तानबाट कस्ता निर्देशनहरू प्राप्त भइरहेका थिए र पश्चिमी उत्तर प्रदेशमा उनीहरूको सञ्जालमा अरू को-को संलग्न छन् भन्ने विषयमा अनुसन्धान जारी रहेको छ। सुरक्षा निकायहरूले आगामी दिनमा यस प्रकरणबाट थप ठूला खुलासा हुन सक्ने बताएका छन्।

हिन्दुस्थान समाचार / भवानी थामी