इम्फाल, २० जून (हि.स.)। मणिपुरमा सुरक्षा बल र पुलिसले उग्रवादी संगठनविरुद्ध सञ्चालन गरिरहेको अभियानअन्तर्गत विभिन्न संगठनका धेरै सक्रिय क्याडरलाई पक्राउ गरेका छन्। साथै, उग्रवादी संगठनमा भर्ती गरिँदै गरेका एक किशोरलाई पनि सुरक्षित रूपमा उद्धार गरिएको छ।

उखरूलस्थित पीएनबी ब्याङ्क डकैती प्रकरण, पाँचौँ आईआरबी हतियार लुट प्रकरण, जिरीबाममा एक हमार महिलाको हत्या, चार कुकी समुदायका व्यक्तिको अपहरण तथा हत्या, नारायणसेनामा सीआरपीएफमाथिको आक्रमण तथा मुख्यमन्त्रीको काफिलामाथि गरिएको घातक आक्रमणजस्ता घटनाको जाँच चलिरहेका बेला यो कारबाही गरिएको हो।

पुलिसका अनुसार, १९ जूनमा सुरक्षा बलले चुराचाँदपुर थाना क्षेत्रको सोंगपी गाउँबाट यूकेएनएका एक सक्रिय किशोर क्याडरलाई पक्राउ गरेको छ। सोही दिन मणिपुर पुलिसले इम्फाल पश्चिम जिल्लाको सिंगजामेई थाना क्षेत्रस्थित मैबाम लैकाईबाट केसीपी (पीडब्ल्यूजी) का सक्रिय क्याडर सुरेनसांगबाम बुंगचा उर्फ विनर (४६) लाई पक्राउ गरेको छ।

यसअघि १८ जूनमा सुरक्षा बलले इम्फाल पश्चिम जिल्लाको लुकर मायाई लैकाईस्थित निवासबाट केसीपी (पीडब्ल्यूजी) का स्वयंघोषित क्याप्टेन तथा सक्रिय रकम असुलीकर्ता वाङ्खेम प्रेमजीत सिंह उर्फ कमचा उर्फ इबोमचा (४६) लाई पक्राउ गरेको थियो।

अर्को अभियानमा आईएसबीटी कम्प्लेक्स क्षेत्रबाट आरपीएफ/पीएलएका सक्रिय क्याडर आरके सोलोमन सिंह उर्फ आमोन (५१) तथा उनका सहयोगी थाङ्मेइशाङ कासार (३२) लाई पक्राउ गरिएको छ। यस क्रममा उनीहरूले संगठनमा भर्ती गराउने प्रयास गरिरहेका एक किशोरलाई पनि उद्धार गरिएको छ।

यसैगरी, सुरक्षा बलले इम्फाल पूर्व जिल्लाको कोंगबा बजार क्षेत्रबाट आरपीएफ/पीएलएका स्वयंघोषित लेफ्टिनेन्ट कर्नेल तथा गुप्तचर विभागका प्रभारी सराङ्थेम जयन्ता मीतेई उर्फ बिकी उर्फ वाङ्लेन (४८) लाई पक्राउ गरेको छ।

पक्राउ परेका उग्रवादीहरूको कब्जाबाट आपत्तिजनक सामग्रीका साथै २ हजार रुपियाँ नगद र एउटा बोलेरो क्याम्पर सवारीसाधन बरामद गरिएको पुलिसले जनाएको छ। घटनाबारे थप जाँच जारी रहेको छ।

---------------

हिन्दुस्थान समाचार / भवानी थामी