मुम्बई, २० जून (हि.स.)। मुम्बईस्थित विशेष सीबीआई अदालतले महाराष्ट्रको बहुचर्चित पवनराजे निंबालकर हत्या प्रकरणमा प्रमाणको अभाव देखाउँदै पूर्वमन्त्री पद्मसिंह पाटिलसहित सबै नौ अभियुक्तलाई शनिबार निर्दोष घोषणा गरेको छ। अदालतको यस निर्णयप्रति पवनराजे निंबालकरका छोरा तथा सांसद ओम राजे निंबालकरले असन्तुष्टि जनाउँदै उच्च अदालतमा चुनौती दिने बताएका छन्।

विशेष सीबीआई अदालतका न्यायाधीश सत्यनारायण नावन्दरले शनिबार पवनराजे निंबालकर र उनका चालक समद काजीको हत्या सम्बन्धी मुद्दाको फैसला सुनाएका थिए। फैसला सुनुवाइका क्रममा सबै नौ अभियुक्त अदालतमा उपस्थित थिए।

अदालतले यस प्रकरणका सरकारी साक्षी (माफीका साक्षीदार) पारसमल जैनको बयानमाथि गम्भीर प्रश्न उठाएको थियो। अदालतले भन्यो, साढे चार किलोग्राम सुन र धेरै पसल भएका व्यक्तिले केवल ५० हजार रुपियाँका लागि माफीका साक्षीदार बन्नु विश्वासयोग्य देखिँदैन। साथै, उनको बयानका धेरै पक्षहरू तथ्यसँग मेल नखाने देखिएको अदालतको टिप्पणी थियो।

न्यायाधीशले साक्षीदारको बयान कथाजस्तो देखिएको उल्लेख गर्दै अनुसन्धानका क्रममा उनलाई अर्को मुद्दामा पक्राउ गरिएको र औषधिसमेत बन्द गरिएको अवस्थाले उनको बयानलाई पूर्ण रूपमा विश्वसनीय मान्न नसकिने बताए। त्यसपछि अदालतले पारसमल जैन, मुख्य अभियुक्त पद्मसिंह पाटिल तथा अन्य सबै अभियुक्तलाई निर्दोष ठहर गर्यो।

फैसलापछि सांसद ओमराजे निंबालकरले प्रतिक्रिया दिँदै भने, “यो कलियुग हो, यति मात्र भन्न सक्छु।” उनले प्रारम्भमा मुम्बई पुलिसले र पछि सीआईडीले गरेको अनुसन्धान सन्तोषजनक नभएको भन्दै आफू उच्च अदालत गएको र त्यसपछि मुद्दाको अनुसन्धान सीबीआईलाई सुम्पिएको स्मरण गराए। उनले अब पनि यस फैसलाविरुद्ध उच्च अदालत जाने र आफ्नो पक्ष पुनः राख्ने बताए।

उल्लेखनीय छ, हाल धाराशिवका सांसद ओमराजे निंबालकरका पिता पवनराजे निंबालकर तथा उनका चालक समद काजीको ३ जून, २००६ मा नवी मुम्बईको कलम्बोली नजिक गोली हानी हत्या गरिएको थियो। उक्त घटनामा तत्कालीन गृहमन्त्री पद्मसिंह पाटिलसहित नौ जनामाथि संलग्नताको आरोप लागेको थियो। पाटिललाई सन् २००९ मा पक्राउ गरिएको भए पनि पछि जमानतमा रिहा गरिएको थियो। यस मुद्दाका सबै अभियुक्त जमानतमै थिए र शनिबार विशेष सीबीआई अदालतले सबैलाई निर्दोष ठहर गरेको हो।

---------------

हिन्दुस्थान समाचार / भवानी थामी