नयाँ दिल्ली, २३ जून (हि.स.)। विश्वव्यापी तनाउ र होर्मुज जलडमरूमध्यलाई लिएर लामो समयदेखि कायम अनिश्चितताबीच भारतका लागि राहतको खबर आएको छ। युरिया, डाई-अमोनियम फस्फेट (डीएपी) र सल्फर बोकेका चार मालवाहक जहाज गत साता सफलतापूर्वक होर्मुज जलडमरूमध्य पार गरेर भारतीय बन्दरगाहतर्फ अघि बढिरहेका छन्। यी जहाजहरू निर्धारित भारतीय बन्दरगाहमा पुगेपछि देशमा रहेको हालको उर्वरक भण्डार अझ सुदृढ़ हुने अपेक्षा गरिएको छ।

भारत सरकारको आधिकारिक वक्तव्यअनुसार, युरिया, डीएपी र सल्फरको खेप बोकेका चारवटा मालवाहक जहाज सुरक्षित रूपमा होर्मुज जलडमरूमध्य पार गरिसकेका छन्। ती जहाजहरू अहिले भारतका विभिन्न बन्दरगाहतर्फ गइरहेका छन्। जहाजहरू कृष्णापटनम, काकीनाडा, पारादीप र मुन्द्रा बन्दरगाहमा पुग्नेछन्, जहाँबाट मलको खेप छिटो उतारेर किसानहरूलाई समयमै उपलब्ध गराइनेछ।

सरकारका अनुसार, २२ जूनसम्म देशमा कुल १९६.०८ लाख टन मलको भण्डार रहेको छ, जुन गत वर्षको सोही अवधिमा रहेको १६८.६७ लाख टनको तुलनामा उल्लेखनीय रूपमा बढी हो। हालको भण्डारमा ८१.४४ लाख टन युरिया, २०.९२ लाख टन डीएपी, ५५.९१ लाख टन एनपीके, १२.६८ लाख टन एमओपी तथा २५.१३ लाख टन एसएसपी समावेश छन्।

यसबीच कृषि क्षेत्रमा मलको माग पनि बढेको देखिएको छ। यस वर्ष मार्च १ देखि जून २१ सम्म कुल १५३.४ लाख टन मल बिक्री भएको छ, जबकि गत वर्ष सोही अवधिमा यो मात्रा १४०.२ लाख टन थियो। अर्थात् यस वर्ष बिक्रीमा १३.२ लाख टनले वृद्धि भएको छ।

भारतीय किसानहरूलाई विश्व बजारको अनिश्चितताबाट सुरक्षित राख्न सरकारले स्वदेशी उत्पादन क्षमतालाई अधिकतम उपयोग गर्नुका साथै लक्षित आयातलाई पनि प्रोत्साहन दिएको छ। पश्चिम एशियाली संकटपछि घरेलु उत्पादनमा उल्लेखनीय वृद्धि भई यो १३३.१२ लाख मेट्रिक टन पुगेको छ। यस बलियो घरेलु उत्पादनसँगै उक्त अवधिमा भारतीय बन्दरगाहहरूमा कुल ४३.६९ लाख मेट्रिक टन मल आयात भएको छ।

सरकारले ओमान, मलेसिया, भियतनाम, जर्जिया, नाइजेरिया, रूस, फिनल्यान्ड, इजिप्ट, अल्जेरिया, टर्किये र नेदरल्यान्ड्सबाट युरियाको आपूर्ति सुनिश्चित गरेको जनाएको छ। त्यसैगरी डीएपी तथा एनपीके उर्वरकको आपूर्ति लाल सागर समुद्री मार्गमार्फत रूस, मोरक्को, इजिप्ट, अमेरिका, जोर्डन, दक्षिण कोरिया, ट्युनिसिया र साउदी अरबबाट सुनिश्चित गरिएको छ।

---------------

हिन्दुस्थान समाचार / भवानी थामी