कुवेत सिटी/मनामा/तेहरान/वाशिङ्टन, १३ जुलाई (हि.स.)। होर्मुज जलडमरूमध्यलाई लिएर अमेरिका र इरानबीच जारी शक्ति संघर्षका कारण पश्चिम एशियाको अवस्था फेरि तनाउपूर्ण बनेको छ। इरानले कुवेतस्थित अमेरिकी सैन्य अड्डामा आक्रमण गरेको छ। यसअघि इरानले अमेरिकाको पछिल्लो आक्रमणपछि बहराइनस्थित अमेरिकी सैन्य अड्डालाई पनि निशाना बनाएको थियो, जहाँ आक्रमणको चेताउनीस्वरूप साइरन बज्न थालेका थिए।

सीएनएन, अल जजिरा, इरना र फार्सका अनुसार, इरानको इस्लामिक रिभोलुसनरी गार्ड कोर्प्स (आईआरजीसी) ले आज कुवेतमा रहेको अमेरिकी सैन्य अड्डाको पूर्वाधारलाई लक्षित गरी क्षति पुर्‍याएको जनाएको छ। आईआरजीसीका अनुसार, अली अल सलेमस्थित अमेरिकी अड्डामा रहेका इन्धन भण्डारण ट्याङ्की तथा प्याट्रियट एयर डिफेन्स प्रणाली पूर्ण रूपमा ध्वस्त पारिएको छ। साथै, करिब ३० माइल टाढा रहेको अहमद अल जाबेर एयर बेसमा पनि आक्रमण गरिएको र त्यहाँको एफपीएस राडार प्रणाली क्षतिग्रस्त भएको दाबी गरिएको छ। यद्यपि कुवेती सेनाले हालसम्म यी आक्रमणहरूको पुष्टि गरेको छैन।

बहराइनको गृह मन्त्रालयले आज बिहान (स्थानीय समयअनुसार) एक्समार्फत नागरिक तथा बासिन्दालाई शान्त रहन र नजिकको सुरक्षित स्थानमा जान आग्रह गरेको छ। आईआरजीसीले टेलिग्राममार्फत अमेरिका समर्थित देशहरूमा रहेका अमेरिकी सैन्य अड्डाहरूमा मिसाइल तथा ड्रोन आक्रमण शुरु गरिएको घोषणा गरेको छ। यो घोषणा इरानका मध्य तथा दक्षिणी क्षेत्रमा भएको आक्रमणपछि गरिएको हो।

आईआरजीसीले बहराइनस्थित अमेरिकी सैन्य अड्डाहरूमा पनि आक्रमण गरेको जनाएको छ। वाशिङ्टनका आक्रमणको प्रत्युत्तरस्वरूप इरानी वायुसेनाले शेख इसास्थित अमेरिकी एयर बेसमा रहेको हेलिकोप्टर मर्मत तथा सम्भार केन्द्र, पी-८ पोसाइडन विमान राखिने ह्याङ्गर तथा अमेरिकी सेनाको ड्रोन कमाण्ड एन्ड कन्ट्रोल सेन्टरलाई निशाना बनाएको दाबी गरेको छ। बहराइनको गृह मन्त्रालयले हालसम्म कुनै क्षतिको जानकारी प्राप्त नभएको जनाएको छ।

अमेरिकी सेनाको सेन्ट्रल कमाण्ड (सेंटकॉम) ले एक्समार्फत इरानविरुद्धको पछिल्लो कारबाहीमा अत्याधुनिक हतियार प्रयोग गरी विभिन्न स्थानमा रहेका दर्जनौँ सैन्य संरचनालाई निशाना बनाइएको जनाएको छ। सेंटकमका अनुसार, पहिलोपटक लडाकु विमान, नौसैनिक जहाज, एकतर्फी आक्रमण गर्ने हवाई ड्रोन तथा समुद्री ड्रोन प्रयोग गरिएको थियो। आक्रमणमा इरानको हवाई प्रतिरक्षा प्रणाली, तटीय राडार केन्द्र, मिसाइल तथा ड्रोन क्षमता र साना नौकाहरूलाई लक्षित गरिएको थियो।

सेंटकमले एक दिनअघि इरानका करिब १४० सैन्य अड्डालाई निशाना बनाइएको जनाएको छ। यसको जवाफमा तेहरानले बहराइन, कुवेत, ओमान, कतार तथा जोर्डनमा प्रतिआक्रमण गरेको बताइएको छ।

इरानका बन्दर अब्बास, सिरिक, जास्क लगायतका बन्दरगाह शहर तथा केशम द्वीपमा पनि शक्तिशाली विस्फोट भएका खबर आएका छन्। अमेरिकी राष्ट्रपतिले होर्मुज जलडमरूमध्य खुल्ला रहेको दाबी गरेका छन्। तर इरानको फारस खाडी जलडमरूमध्य प्राधिकरणले स्थायित्व र शान्ति पुनःस्थापना नभएसम्म त्यहाँ आवतजावत गर्न अनुमति नदिइने जनाएको छ।

हिन्दुस्थान समाचार / बिशाल