कोहिमा, २१ जुलाई (हि.स.)। नागाल्यान्डमा लगातार भइरहेको मुसलधारे वर्षाका कारण आएको आकस्मिक बाढ़ी र पहिरोले व्यापक विनाश मच्चाएको छ। यस प्राकृतिक विपद्मा मृत्यु हुनेको संख्या बढ़ेर नौ पुगेको छ। मोन जिल्लामा मंगलवार थप पाँच शव फेला परेका छन् भने चार जना अझै बेपत्ता छन्। उनीहरूको खोजीमा राहत तथा उद्धार टोलीहरूले निरन्तर अभियान सञ्चालन गरिरहेका छन्। यो जानकारी नागाल्यान्ड राज्य विपद् व्यवस्थापन प्राधिकरण (एनएसडीएमए) ले दिएको हो।

एनएसडीएमएक अनुसार, प्रारम्भिक मूल्याङ्कनमा राज्यभर ७,४६० भन्दा बढ़ी व्यक्ति बाढ़ी र पहिरोबाट प्रभावित भएका छन्। विस्तृत सर्वेक्षणपछि प्रभावित व्यक्ति तथा सम्पत्तिको क्षतिको तथ्याङ्क अझ् बढ्न सक्ने अनुमान गरिएको छ।

सबैभन्दा बढ़ी प्रभावित मोन जिल्ला भएको छ, जहाँ हालसम्म सबै नौ जनाको मृत्यु दर्ता गरिएको छ। तीमध्ये पाँच जनाको मृत्यु मोन शहरको शान्तम वार्डमा भएको पहिरोमा भएको हो। प्रशासन अनुसार, राहत तथा उद्धार टोलीहरू मलबा हटाउने र बेपत्ता व्यक्तिहरूको खोजी गर्ने कार्यमा निरन्तर जुटेका छन्।

यसैबीच, नागिनिमोरा क्षेत्रमा आएको आकस्मिक बाढ़ीमा बगाइएका चार जनालाई सकुशल उद्धार गरिएको छ। उनीहरूमध्ये एक जना गम्भीर घाइते भएका छन् भने अन्य तीन जनालाई सामान्य चोट लागेको छ। सबै घाइतेलाई उपचारका लागि अस्पतालमा भर्ती रिएको छ।

प्रारम्भिक प्रतिवेदन अनुसार, राज्यका १० जिल्लाका ९३ गाउँहरू यस विपद्बाट प्रभावित भएका छन्। हालसम्म ६४ वटा घरमा क्षति पुगेको पुष्टि भएको छ। अधिकारीहरू अनुसार, दुर्गम क्षेत्रहरूबाट अझै पनि क्षतिको विवरण संकलन भइरहेकाले वास्तविक क्षतिको आँकडा अझ् बढ़ी हुनसक्छ।

विपद्को असर पशुधनमा पनि परेको छ। हालसम्म ८३ वटा गाईवस्तुको मृत्यु भएको पुष्टि भएको छ, जसमा १५ मिथुन, १३ गाई-गोरू तथा ५३ सुँगुर रहेका छन्। यसले ग्रामीण क्षेत्रमा बसोबास गर्ने धेरै परिवारको जीविकोपार्जनमा गम्भीर प्रभाव पारेको छ।

शामातोर जिल्ला पनि सबैभन्दा बढ़ी प्रभावित क्षेत्रमध्ये एक हो, जहाँ छह वटा गाउँका लगभग ७,००० जना पहिरोबाट प्रभावित भएका छन्। त्यस्तै, तुएनसाङ जिल्लाका १२ गाउँमा २०१ जना प्रभावित भएका छन् भने जुन्हेबोटो जिल्लाका लगभग ३० गाउँमा पहिरोका घटनाबाट २६ जना प्रभावित भएका छन्।

निरन्तर वर्षाका कारण राज्यका धेरै भागमा सड़क सम्पर्क अवरुद्ध भएको छ। सार्वजनिक पूर्वाधार, कृषि भूमि तथा अत्यावश्यक सेवाहरूमा पनि ठूलो क्षति पुगेको छ। प्रशासनले पहिरोको जोखिम भएका तथा संवेदनशील क्षेत्रमा बसोबास गर्ने नागरिकहरूलाई सतर्क रहन, अनावश्यक यात्रा नगर्न तथा स्थानीय प्रशासनद्वारा जारी निर्देशहरूको पालना गर्न आग्रह गरेको छ।

हिन्दुस्थान समाचार / भवानी थामी