आमिर खान प्रोडक्सनको बहुप्रतिक्षित फिल्म 'बंटवारा 1947' को ट्रेलर सार्वजनिक भएको छ। भावनात्मक पोस्टर र टिजरपछि अब ट्रेलरले फिल्मका बारेमा दर्शकको जिज्ञासा बढाएको छ। राजकुमार सन्तोसीद्वारा निर्देशित यस चलचित्रले ठूलो पर्दामा भारतको विभाजनको दर्दनाक अवधिको कथा भावनात्मक रूपमा वर्णन गरेको छ। ट्रेलरमा विभाजनको समयमा भएको हिंसालाई प्रभावशाली रूपमा चित्रण गरेको छ।
फिल्मको कथा सन् 1947 को विभाजनको पृष्ठभूमिमा आधारित छ, जहाँ एक परिवारले हिंसा, डर र जबरजस्ती बसाइँसराइको त्रासदीको सामना गरिरहेको छ। आफ्ना प्रियजनहरूबाट अलग भएको पीडाको बिचमा फिल्मले घृणाभन्दा मानवता र आशा प्रबल हुन्छ भन्ने सन्देश दिएको छ। ट्रेलरमा सन्नी देओलले सिद्धान्तवादी पुरुषको भूमिका निर्वाह गरेका छन् भने शबाना आजमीले सशक्त वृद्ध महिलाको भूमिका निर्वाह गरेकी छन्। यसैबिच, प्रीति जिन्टाले कठिन परिस्थितिमा आफ्नो परिवारलाई एकताबद्ध राख्ने प्रयास गरिरहेको देखिन्छ।
फिल्ममा शबाना आजमी, सन्नी देओल, प्रीति जिन्टा, करण देओल, अली फजल र अभिमन्यु सिंहको मुख्य भूमिका रहेको छ। विशेष कुरा के हो भने लगभग 30 वर्षपछि निर्देशक राजकुमार सन्तोषी र सन्नी देओलको सफल जोडीले फेरि सँगै काम गरिरहेको छ। फिल्मको सङ्गीत एआर रहमानले दिएका छन् भने गीत जावेद अख्तरले लेखेका छन्। आमिर खान र अपर्णा पुरोहितद्वारा निर्मित 'बंटवारा 1947' 14 अगस्त, 2026 मा विश्वभरका सिनेमाघरहरूमा रिलिज हुनेछ।
--------
हिन्दुस्थान समाचार / बिशाल
