राँची, 29 जुलाई (हि.स.)। झारखण्डमा सुरक्षा बलले नक्सालवादविरुद्ध चलिरहेको अभियानमा ठूलो सफलता हासिल गरेको छ। प्रतिबन्धित भाकपा (माओवादी) का केन्द्रिय समिति सदस्य र एक करोड़ रुपियाँ पुरस्कार पाएका नक्सालवादी मिसिर बेसरा उर्फ सागर दा संयुक्त अभियानको एक हिस्साका रूपमा पक्राउ परेका छन्। उनीसँगै सङ्गठनका दुई सक्रिय सदस्य र अन्य दुई जनालाई पनि हिरासतमा लिइएको छ। बेसरामाथि झारखण्डमा 141 वटा मुद्दा दर्ता छन्।

गिरीडीह-धनबाद सीमा क्षेत्रमा नक्सलवाद विरुद्धको विशेष कारबाहीबाट बच्न मिसिर बेसरा र उनका चार सहयोगी टाटा म्याजिक गाडीमा भाग्ने प्रयास गरेको बताइएको छ। सुरक्षा बलले उनलाई धनबादको बरवाडाबाट घेरा हालेर पक्राउ गरेको थियो।

झारखण्ड पुलिस र सीआरपीएफको संयुक्त टोलीले गुप्तचर सूचनाको आधारमा यो सफलता हासिल गरेको हो। टाटा म्याजिकबाट तीन एके 47 राइफल पनि बरामद गरिएको छ। मङ्गल मुर्मू र दिनेश रायका अतिरिक्त क्षेत्रीय समिति सदस्य तुम्बा माञ्झी र क्षेत्र समिति सदस्य बीरेन हांसदालाई पक्राउ गरिएको छ।

चारैजनालाई केन्द्रिय र राज्य सुरक्षा एजेन्सीहरूले सोधपुछ गरिरहेका छन्। झारखण्डका आईजी (अपरेसन) नरेन्द्र कुमार सिंहले बुधबार ती सबैलाई पक्राउ गरेको पुष्टि गरेका छन्। मिसिर बेसरा लामो समयदेखि सुरक्षा निकायका लागि ठूलो चुनौती बनेको थियो। उनी झारखण्ड, बिहार, ओडिसा र छत्तीसगढमा सक्रिय छन्। उनीमाथि सुरक्षा बलमाथि आक्रमण, हत्या, लेवी सङ्कलन र विस्फोट जस्ता थुप्रै जघन्य घटनामा संलग्न भएको आरोप लगाइएको छ।

-------

हिन्दुस्थान समाचार / भवानी थामी