कोलकाता, 31 जुलाई (हि.स.)। पश्चिम बङ्गालमा गिरफ्तार गरिएका तृणमूल काङ्ग्रेसका नेता तथा पूर्व विधायक तथा पूर्व मेयर सब्यसाची दत्तका लागि समस्या बढ्दै गएको छ। राज्य पुलिसको कारबाहीपछि अब प्रवर्तन निदेशालय (ईडी) ले पनि उनी विरुद्ध अनुसन्धानलाई तीव्र बनाएको छ। शुक्रवार बिहान ईडीले पार्क स्ट्रिट, खिदिरपुर र शहरका अन्य क्षेत्रहरू सहित कोलकाताका कूल 11 स्थानमा एकैसाथ छापा माऱ्यो।

सूत्रहरू अनुसार, सब्यसाची दत्त र उनका नजिकका मानिसहरूसँग सम्बन्धित परिसरमा ईडीको कारबाही भइरहेको छ। एजेन्सीले वित्तीय लेनदेन र अवैध सम्पत्ति सम्बन्धी कागजातहरूको जाँच गरिरहेको छ।

उल्लेखनीय कुरा के छ भने 08 जूनमा बिधाननगर उत्तर पुलिसले सब्यसाची दत्तलाई असूलीको आरोपमा पक्राउ गरेको थियो। गिरफ्तारीपछि पुलिसले विभिन्न स्थानमा खोजी गरेको छ। अनुसन्धानका क्रममा राजारहाट स्थित उनको फ्ल्याट र ब्याङ्क लकरबाट लगभग साढ़े 3 किलोग्राम सुन जफत भएको थियो।

पुलिसले बलजफ्ती असूलीबाट प्राप्त पैसाबाट सुन खरिद गरिएको अनुसन्धानले देखाएको दाबी गरेको छ। यसअघि पुलिसले सब्यसाची दत्त र उनकी पत्नी इन्द्राणी दत्तको पाँच वटा ब्याङ्क खाता फ्रिज गरेको थियो। पुलिस अनुसार, यी खाताहरू, फिक्स डिपोजिट र नगद सहित कूल लगभग 3.70 करोड़को राशि जफत गरिएको छ।

जाँच एजेन्सीहरूले बिधाननगरका पूर्व मेयरको स्वामित्वमा रहेको यति ठूलो सम्पत्ति र पैसाको स्रोतको पनि पत्ता लगाइरहेका छन्। यसै क्रममा ईडीले पनि कागजात सङ्कलन गर्ने प्रक्रिया शुरु गरेको छ।

यस मामिलामा जून महिनामा नदिया जिल्लाको करिमपुरमा सब्यसाची दत्तसँग नजिक रहेको भनिने टीएमसी नेता टिना भौमिक साहाको घरबाट पनि पुलिसले ठूलो मात्रामा सुन जफत गरेको थियो। सोही समय साल्ट लेकको एइ ब्लकको एक घरका वृद्ध मालिकले सब्यसाची दत्तले आफूबाट 46 लाखको असूली लिएको आरोप लगाएका थिए।

ईडी सूत्रहरू अनुसार, एजेन्सीले हाल पुलिसले दर्ता गरेको एफआइआरको आधारमा कागजात सङ्कलन गरेको छ। यद्यपि, मनी लान्ड्रिंग मामिलामा ईडीले छुट्टै प्रवर्तन मुद्दा सूचना रिपोर्ट (ईसीआईआर) दर्ता गर्न बाँकी छ। अनुसन्धान जारी छ।

हिन्दुस्थान समाचार / भवानी थामी