तेहरान, 0८ जुलाई (हि.स.)। इरानका विभिन्न शहरमा शक्तिशाली विस्फोट भएका छन्। यसैबीच, इराकको नजफमा रहेका इरानी राष्ट्रपति मसुद पेजेश्कियान अमेरिकी सैन्य हमलाको जानकारी पाएपछि स्वदेश फर्किएका छन्। इरानको शीर्ष नेतृत्व हाल पूर्व सर्वोच्च नेता अयातुल्लाह सैयद अली खामेनेईको अन्त्येष्टि कार्यक्रमका औपचारिकतामा व्यस्त रहेको छ। खामेनेईको पार्थिव शरीर हाल नजफमा राखिएको छ। त्यसपछि इराकको कर्बलामा श्रद्धाञ्जलि कार्यक्रम आयोजना गरिनेछ र बिहीबार इरानको मशहदमा उनको अन्तिम संस्कार गरिनेछ।
इरानको सरकारी प्रसारक आईआरआईबी र अमेरिकी समाचार संस्था सीएनएनका अनुसार, राष्ट्रपति मसुद पेजेश्कियान इराकबाट तेहरान फर्किरहेका छन्। उनी खामेनेईको अन्त्येष्टिमा सहभागी हुन नजफ पुगेका थिए। इरानको सरकारी समाचार एजेन्सी इरनाका अनुसार, इराक भ्रमण सम्पन्न गरेपछि उनले बुधबार बिहानै (स्थानीय समयअनुसार) नजफ छोडेका हुन्।
राष्ट्रपति पेजेश्कियानको स्वदेश फिर्ती शोकमा डुबेको इरानमा अमेरिकी सैन्य कारबाहीबीच भएको हो। अमेरिकी सेनाले होर्मुज जलडमरूमध्यबाट आवतजावत गर्ने व्यापारिक जहाजहरूमाथि इरानले गरेको भनिएको आक्रमणको जवाफस्वरूप सैन्य कारबाही गरेको जनाएको छ। अमेरिकी सेन्ट्रल कमाण्ड (सेन्टकम) ले अन्तरराष्ट्रिय
जलमार्गमा व्यापारिक जहाजमाथि आक्रमणको मूल्य इरानले चुकाउनुपर्ने चेताउनी दिएको छ। अमेरिकाको दाबीअनुसार, इरानले होर्मुज जलडमरूमध्य हुँदै गइरहेका तीन व्यापारिक जहाजमाथि आक्रमण गरेको थियो, जुन युद्धविरामको स्पष्ट उल्लङ्घन भएको सेन्टकमले जनाएको छ।
अल जजिराका अनुसार, दक्षिणी इरानका सिरिक, केश्म, बन्दर अब्बास तथा आसपासका क्षेत्रमा लगातार विस्फोटका आवाज सुनिएका छन्। इरानी सञ्चारमाध्यमका अनुसार, सिरिक बन्दरगाहमा प्रोजेक्टाइल (मिसाइल वा रकेट) व्यापारिक तथा माछा मार्ने जहाजका घाटमा खसेका छन्। यसअघि अमेरिकी वित्त मन्त्रालयले इरानलाई अस्थायी रूपमा कच्चा तेल उत्पादन, बिक्री र आपूर्तिको अनुमति दिने लाइसेन्स रद्द गरेको थियो, जसले तेहरानमाथिको दबाउ थप बढाएको छ।
इरानले भने अमेरिकाद्वारा लाइसेन्स रद्द गर्नु दुई पक्षबीचको समझदारीको उल्लङ्घन भएको आरोप लगाएको छ। इरानी विदेश मन्त्रालयले अमेरिकी आक्रमणको कडा निन्दा गरेको छ। यसैबीच राष्ट्रपति पेजेश्कियानले अयातोल्लाह सैयद अली खामेनेईप्रति श्रद्धाञ्जलि कार्यक्रम आयोजना गरेकोमा इराक सरकार र त्यहाँका जनतालाई धन्यवाद दिएका छन्। उनले यस कार्यक्रमलाई दुई देशबीचको गहिरो ऐतिहासिक, सांस्कृतिक र धार्मिक सम्बन्धको प्रतीक भएको बताउँदै विभिन्न क्षेत्रमा आपसी सहकार्य थप सुदृढ़ बनाउनुपर्नेमा जोड दिएका छन्।
हिन्दुस्थान समाचार / बिशाल
13 Jul 2026
